Түрікменстан президенті Сердар Бердімұхамедов Әзербайжанға ресми сапары аясында президент Ильхам Әлиевпен кездесті.
Кездесуде көлік, энергетика, экономика және өнеркәсіпті қоса алғанда, түрлі салалардағы ынтымақтастықты дамыту мәселелері талқыланды.
Сапар аясында Әлиев пен Бердімұхамедовтың қатысуымен Әзербайжан тарапынан Түрікменстанға сыйға тартылған «Достық» (Dostluq) деп аталатын мұнай танкерін онлайн режимде тапсыру рәсімі өтті.
Баку кеме жасау зауытында салынған танкердің ұзындығы 141 метр, ені 16,9 метр, ал суға бату тереңдігі (осадкасы) 4,54 метрді құрайды. Жүк көтерімділігі 7 мың 875 тонна болатын бұл танкер екі ел арасындағы достық пен ынтымақтастықтың символының бірі ретінде бағалануда.
Келіссөздерден кейін Әлиев пен Бердімұхамедов бірлескен мәлімдемеге қол қойды. Сонымен қатар кеден, спорт, еңбек және әлеуметтік қорғау, денсаулық сақтау, азық-түлік қауіпсіздігі, өнеркәсіп, энергетика, ауыл шаруашылығы, экономика және қаржы салаларында тиісті мекемелер арасында түрлі келісімдер мен өзара түсіністік меморандумдары бекітілді.
Құжаттарға қол қойылғаннан кейін бірлескен баспасөз мәслихаты ұйымдастырылды.
Әлиев көлік және логистика саласындағы ынтымақтастықтың тек екі ел үшін ғана емес, ауқымдырақ географиялық аймақ үшін де стратегиялық маңызы бар екенін атап өтті.
Әлемде сенімді әрі қауіпсіз көлік дәліздерінің саны шектеулі екеніне назар аударған Әлиев: «Егер елдеріміз арасында өзара саяси сенім болмағанда, қазіргі географиялық мүмкіндіктердің өзі бұл жобаларды жүзеге асыруға жеткіліксіз болар еді. Артып келе жатқан жүк тасымалын одан әрі дамыту және үшінші елдерден жаңа жүк ағындарын тарту мақсатында көлік-логистика саласындағы үйлестіруді күшейтуге уағдаластық», — деді.
Түрікменстан президенті Сердар Бердімұхамедов те Әзербайжан тарапынан сыйға тартылған «Достық» мұнай танкері үшін алғыс айтып, бұл сыйлықты екі ел арасындағы бауырластық қарым-қатынастардың нышаны ретінде қабылдайтындарын білдірді.
Танкердің екі мемлекеттің де дамуына үлес қосатынына сенім білдірген Бердімұхамедов Түрікменстанның Әзербайжанмен байланыстарды одан әрі тереңдетуге үлкен мән беретінін атап өтті.
Бердімұхамедов Әзербайжан мен Түрікменстан халықтарын ғасырлар бойы жалғасып келе жатқан тату көршілік қарым-қатынастар, ортақ тарих, мәдениет, тіл және рухани құндылықтар байланыстырып тұрғанын да тілге тиек етті.
