Пекиннің мемлекеттік телерадиокорпорациясының хабарлауынша, Қытайдың солтүстік-шығысындағы мейрамханада сейсенбі күні болған өрт салдарынан 22 адам қаза тауып, 3 адам жарақат алған.
“CCTV” арнасының мәліметінше, өрт Пекиннен шамамен 580 шақырым солтүстік-шығыста орналасқан Ляояң қаласында 29 сәуір күні сағат 12:25-те басталған. 14:00-ге дейін өрт 22 адамның өліміне және 3 адамның жарақаттануына алып келген.
Қытай төрағасы Си Цзиньпин бұл өрттің "елеулі адам шығынына" себеп болғанын атап өтіп, мұндай оқиғалардан "аса маңызды сабақ алу қажеттігін" айтты.
Си Цзиньпин: "Жарақат алғандарға барлық мүмкін көмекті көрсету, қаза болғандардың істерін тиісті түрде реттеу, олардың отбасыларына қолдау көрсету, өрттің себебін шұғыл анықтау және заң аясында жауапкершілікті қатаң қадағалау керек," – деп мәлімдеді.
“AFP” агенттігі растаған интернеттегі бейнежазбаларда екі қабатты мейрамхананы шарпыған алапат өрт пен көкке көтерілген қалың қара түтін анық көрінеді.
Қытайдың “Douyin” (TikTok-тың қытайлық нұсқасы) желісінде жарияланған басқа бейнежазбаларда жедел жәрдем қызметкерлерінің бір құрбанды зембілмен тасып жатқаны және бірнеше өрт сөндірушінің құбыршектермен жалынды сөндіруге тырысып жатқаны бейнеленген.
Қытайда өлімшіл өрт оқиғалары көбіне ғимарат қауіпсіздігі талаптарының сақталмауы және еңбек қауіпсіздігіне немқұрайлы қарау салдарынан жиі болып тұрады.
Осы айда Қытайдың солтүстігіндегі Хэбэй провинциясында қарттар үйінде шыққан өрттен 20 адам қайтыс болды.
Қаңтар айында Пекиннің солтүстік-батысындағы Чжанцзякоу қаласындағы көкөніс базарында шыққан өрт салдарынан 8 адам қаза тауып, 15 адам жарақат алған.
Бұған дейін Қытайдың шығысындағы Жунчэн қаласындағы құрылыс алаңында болған өртте 9 адам өмірден өткен еді.
