Сирияның Ракка провинциясында қауіпсіздік күштері бұрын YPG террористік ұйымы басқарған түрмеден 18 жасқа толмаған 126 тұтқынды босатты. Сирияның “Alikhbaria” мемлекеттік телеарнасы босатылғандардың барлығы балалар екенін хабарлады.
Арнаның аты-жөні көрсетілмеген қауіпсіздік көздеріне сілтеме жасаған хабарында: «Ішкі қауіпсіздік бөлімшелері Раккадағы “Al Aqtan” түрмесінен 18 жасқа толмаған 126 тұтқынды босатты» деп айтылған.
Ақпарат министрі Хамза әл-Мустафа “X” әлеуметтік желісіндегі жазбасында Сирия Араб ақпарат агенттігі “SANA” жариялаған бейнематериалдар тұтқындардың босатылғанын көрсететінін мәлімдеді.
Әл-Мустафа: «Бұл балалар жай ғана тұтқындар емес, балалық шағынан айырылған перзенттер. Олар мектептерде, ойын алаңдарында болуы тиіс еді, алайда түрме қабырғаларының артында қалды. Әрбір жүзде қорқыныш, жақындардан айрылу және жоғалған пәктіктің тарихы жатыр», - деді.
Балалардың түрмеде ұсталуы адамзат ар-ұжданына нұқсан келтіретін жағдай екенін атап өткен әл-Мустафа: «Бірде-бір ұран, бірде-бір сылтау немесе қауіпсіздікке қатысты себеп баланың түрме камерасында отыруын ақтай алмайды», – деп қосты.
Әділет министрлігі жұма күні жасаған мәлімдемесінде мемлекеттік билікті қалпына келтіру және мекемелерді құқықтық негізде қайта іске қосу аясында YPG күштері шегінгеннен кейін “Al Aqtan” түрмесінің ресми түрде мемлекет қарамағына алынғанын хабарлады. Ішкі істер министрлігі де тұтқындардың істері тексеріле бастағанын мәлімдеді.
Сонымен қатар Сирия армиясы 18 қаңтардағы келісімнің орындалуының алғашқы кезеңі шеңберінде Раккадағы “Al Aqtan” түрмесі мен оның маңынан шығарылған YPG мүшелерін Алеппоның шығысындағы Айн әл-Араб қаласына көшіру басталғанын хабарлады.
