Израиль Қорғаныс министрі Исраэль Кац сенбі күні жасаған мәлімдемесінде ұлттық қауіпсіздікке төнген маңызды қатерлерді негізге ала отырып, Израильдің Иранға қарсы «алдын алу шабуылын» (preventive strike) ұйымдастырғанын айтты.
Кац азаматтарды Ішкі майдан қолбасшылығының нұсқауларын орындауға шақырып, ел көлемінде төтенше жағдай жариялады. Министрліктің мәлімдемесінде «Израиль мемлекеті Иранға қарсы «алдын алу шабуылын» бастады. Қорғаныс министрі Исраэль Кац бүкіл ел аумағында дереу күшіне енетін ерекше төтенше жағдай режимін енгізді», — деп айтылды.
Куәгерлер Тегеранның орталығында жойқын жарылыс болып, қою түтін көтерілгенін хабарлады. Иран үкіметі әзірге ресми мәлімдеме жасаған жоқ. “Fars” ақпарат агенттігінің хабарлауынша, Исфахан, Кум, Кередж және Керманшах қалаларында да жарылыс даусы естілген.
Бұл шабуыл Иранның ядролық бағдарламасы бойынша АҚШ-пен келіссөздер жүріп жатқан шиеленісті кезеңде болып отыр. Израиль армиясы ықтимал зымыран соққыларына қарсы сақтық шарасы ретінде әуе дабылы сиреналарын іске қосты. Сондай-ақ армия «білім беру іс-шараларына, бұқаралық шаралар мен жұмыс орындарының қызметіне» тыйым салынғанын жариялады. Әскери мәлімдемеде тек «өміршең маңызы бар секторлардың» бұл тыйымнан босатылғаны айтылды.
Иранның басшылығы нысанаға алынды
Аты-жөнін көрсетпеген АҚШ шенеунігі мен операциядан хабары бар дереккөз АҚШ-тың Иранға қарсы шабуылға қатысқанын, бірақ қатысу ауқымы әлі белгісіз екенін хабарлады. “Reuters” агенттігіне мәлімет берген басқа бір америкалық шенеунік соққылардың әуеден және теңізден жасалғанын айтты.
Иран мен Израиль өз әуе кеңістігін жапқанын жариялады. Алғашқы шабуылдар Иранның рухани көсемі Аятолла Әли Хаменеидің кеңсесіне жақын аймақты нысанаға алған. 86 жастағы Хаменеидің ол сәтте сол жерде болып болмағаны белгісіз. Бір шенеунік “Reuters-ке” Хаменеидің Тегеран тысындағы қауіпсіз жерге жеткізілгенін білдірді.
Иранның “ISNA” ақпарат агенттігі Израильдің алғашқы соққыларынан Төңкеріс сақшыларының көптеген мүшесі, соның ішінде маңызды жедел қызметкерлердің қаза тауып, жараланғанын хабарлады.
Оқиға нақтыланған сайын қосымша ақпарат беріледі.
