Оңтүстік Еуропада жаз мезгілінің алғашқы ірі аптап ыстығы басталды. Италия, Испания, Грекия, Португалия және Францияда ауа температурасы 40°C-тан асып кетті. Бұл жағдай аймақта денсаулыққа қатысты ескертулердің жиілеуіне және орман өрттері қаупінің артуына себеп болуда.
Португалияда жексенбі күні елдің үштен екі бөлігінде жоғары деңгейдегі қауіп ескертуі енгізілді, ал астана Лиссабонда ауа температурасы 42°C-қа жетеді деп күтілуде. Ұлттық метеорология қызметі елдің басым бөлігінде өрт қаупіне байланысты ескерту жасады.
Испанияның метеорология агенттігі “Aemet” температура 42°C-қа жеткен оңтүстіктегі Севилья қаласында «өте жоғары және тұрақты ыстық» халықтың әлсіз тобы үшін елеулі қауіп төндіруі мүмкін екеніне байланысты арнайы ескерту жариялады.
Денсаулық сақтау органдары халықты күн сәулесінен аулақ болуға, көп су ішуге және егде жастағы адамдар мен созылмалы ауруы барларды бақылауда ұстауға шақыруда.
Франция да аптап ыстыққа қарсы дайындық жұмыстарын бастады. Елдің 101 департаментінің 84-інде ыстық толқынына байланысты ескерту жарияланды, ал ауа температурасының 40°C-тан асуы күтілуде.
Од департаментінде шыққан орман өрті салдарынан бір демалыс лагері мен бір монастырь эвакуацияланды. Марсель қаласында халықты аптаптан қорғау мақсатында қоғамдық жүзу бассейндері тегін пайдалануға ашылды.
Грекияда өткен бейсенбіде Афинаның оңтүстігінде басталған ірі орман өртіне қарсы күрес жүргізілді. Бес аймақтан тұрғындар эвакуацияланды, ал көне Посейдон храмы маңындағы жағалау тас жолының бір бөлігі өрт салдарынан жабылды.
Осы арада Біріккен Корольдіктегі Шығыс Мидлендс, Оңтүстік-Шығыс, Оңтүстік-Батыс, Лондон және Шығыс Англия аймақтарына сейсенбіге дейін созылатын қызғылт сары деңгейдегі аптап ыстыққа байланысты денсаулық сақтау ескертуі жарияланды. Дүйсенбі күні ауа температурасының 36°C-қа дейін көтерілуі күтілуде.
Йоркшир мен Хамбер және Батыс Мидлендс аймақтарында сары деңгейдегі ескерту күшінде қалып отыр. Ал Лондон Өрт сөндіру қызметі құрғақ ауа райының жалғасуына байланысты “өте жоғары” орман өрті қаупі бар екенін ескертті.
Бұл соңғы аптап ыстық толқындары Еуроодақтың “Copernicus” климатты бақылау агенттігінің 2025 жылғы наурыз айының Еуропада тіркелген ең ыстық наурыз болғанын растауынан кейін болды. Агенттік мәліметінше, орташа температура 1991–2020 жылдардағы қалыпты көрсеткіштен 2,41°C жоғары болған.
