Түрік мотоспорт үздігі Топрак Разгатлыоглу Дүниежүзілік «Superbike-2025» чемпионатында жоғары дәрежеде өнер көрсетіп, үшінші рет әлем чемпионы атанды. Ол бұл атақты қатарынан екі рет жеңіп алды.
Әлем бойынша «El Turco» деген лақап атпен танымал Разгатлыоглу Испанияның Херес-де-ла-Фронтера қаласында өткен маусымның соңғы негізгі жарысын үшінші орында аяқтап, мерзімінен бұрын чемпион атанды. «ROKiT BMW Motorrad» командасының атынан 10-шы жолақтан шыққан ол 20 айналымдық жарыста тұғырға көтеріліп, жалпы есепте 616 ұпаймен чемпион атанды.
«Aruba Ducati» командасының шабандозы Николо Булега соңғы жарыста жеңіске жетсе, Альваро Баутиста екінші орын алды. Маусым қорытындысы бойынша Булега 603 ұпаймен Разгатлыоглуның ізінше екінші, ал Баутиста 337 ұпаймен үшінші орынға жайғасты.
Разгатлыоглу үшін бұл жеңіс 2021 және 2024 жылдардағы чемпиондықтарына қосылған үшінші жетістік болды.
28 жастағы спортшы жеңісін түрік туын желбіретіп, дөңгелек жағу шоуымен және алтын түсті жарыс костюмімен атап өтті. Трибунадағы жанкүйерлер де түрік туын көтеріп, тарихи сәтке ортақтасты.
