«AFP» тілшісінің хабарлауынша, Крит маңындағы халықаралық су айдынында Израиль күштері тоқтатқан көмек флотындағы ондаған белсенді жұма күні Грекия аралына жетті.
Грекияның жағалау күзеті ілесіп жүрген шамамен 175 белсенді төрт автобуспен бір елді мекенге жеткізілді. Билік өкілдері елді мекеннің атауын жарияламады.
Израиль Сыртқы істер министрлігі бұған дейін 20-дан астам кемеден шамамен 175 белсендінің ұсталғанын мәлімдеді. Ал флот ұйымдастырушылары белсенділердің санын 211 адам деп көрсетті.
Израиль Сыртқы істер министрі Гидеон Саар «X» желісіндегі жазбасында: «Грек үкіметімен бірлесе отырып, флот кемелерінен Израиль кемесіне ауыстырылған белсенділерді жақын арада Грекия жағалауына жеткіземіз», – деп мәлімдеп, Грекияға флот белсенділерін қабылдағандары үшін алғыс айтты.
Ұсталғандардың арасында азаматтары бар бірқатар Еуропа елі Израильді белсенділерді босатуға шақырып, бұл әрекетті халықаралық құқықтың ашық бұзылуы деп бағалады.
Алайда АҚШ Израиль билігін қолдап, флотты «шоу» деп атады. АҚШ мемлекеттік департаментінің өкілі Томми Пиготт: «АҚШ барлық одақтасымыздан бұл мәнсіз саяси акцияға қарсы нақты қадам басып, флотқа қатысқан кемелердің портқа кіруіне, тоқтауына, шығуына және жанармай құюына рұқсат бермеуге шақырады», – деді.
Ұйымдастырушылардың мәліметінше, бастапқыда 50-ден астам кемеден құралған флоттың мақсаты Газа қоршауын бұзып, қазан айынан бері күшінде тұрған бітімге қарамастан қолжетімділігі айтарлықтай шектеулі Палестина аумағына гуманитарлық көмек жеткізу болатын.
