Жергілікті шенеуніктердің хабарлауынша, сейсенбі түні жасалған дрон шабуылдарынан Мәскеу және Ленинград облыстарында кемінде бес адам қаза тауып, жеті адам жараланды.
Ресей Қорғаныс министрлігі түні бойы елдің 19 өңірінде Украинада жасалған 320 дронның атып түсірілгенін немесе жойылғанын мәлімдеді.
Мәскеу облысының губернаторы Андрей Воробьев өңірдегі әуе қорғанысы күштері дрон шабуылын тойтарғанын, алайда ең үлкен шығын Чехов ауданында тіркелгенін айтты. Оның сөзінше, шабуылдар Новосёлки өнеркәсіптік аймағында бірнеше өрттің шығуына себеп болған.
Төтенше жағдайлар қызметі қоймада шыққан ірі өртті сөндірді. Сондай-ақ электр трансформаторы мен әкімшілік ғимарат зақымданды.
Воробьев Мәскеу облысында бес адамның қаза тауып, алты адамның жараланғанын мәлімдеді. Ал Солнечково ауылында құлаған дрон сынықтары жеке меншік нысан мен автокөлікке зақым келтірген. Алайда зардап шеккендер жоқ.
Губернатор Ресей күштері Волоколамск, Клин, Чехов және Серебряно-Прудский аудандарының үстінде дрондарды залалсыздандыруды жалғастырып жатқанын айтты.
Ленинград облысындағы қойма зақымданды
Ленинград облысының губернаторы Александр Дрозденко өңірдің солтүстігіндегі Красный Бор ауылы маңында орналасқан қойманың жеке дрон шабуылынан зақымданғанын хабарлады.
Дрозденконың айтуынша, өңірдің әуе кеңістігінде қауіп дабылы жарияланғаннан кейін Ресейдің әуе қорғанысы күштері 17 дронды залалсыздандырған. Шабуыл салдарынан бір адам жараланды.
Ресейдің «Wildberries» интернет-сауда компаниясы басқаратын логистикалық орталықтар шілденің ортасынан бері бірнеше рет нысанаға алынған.
Украина билігі аталған дрон шабуылдарына қатысты әзірге түсініктеме берген жоқ.
