АҚШ-тың құрылғанына 250 жыл толуына орай ұйымдастырылған "4 шілде — Тәуелсіздік күні" мерекелік шараларына қатысу үшін Нью-Йоркке барған Түрік әскери-теңіз күштерінің “TCG Oruçreis” фрегаты Гудзон өзеніне тоқтап, Түркияның атынан өкілдік етті.

Бортында 176 экипаж мүшесі бар кеме Гудзон өзеніне зәкір тастады және 8 шілдеге дейін Нью-Йорк портында қалады.

“TCG Oruçreis” кемесінің командирі, әскери-теңіз штабының полковнигі Кемал Варлы Анадолы агенттігіне берген мәлімдемесінде Түрік әскери-теңіз күштерінің "Көгілдір Отан" аймағындағы тежеуіш күші мен жедел қуатын көрсететін ең маңызды әскери кемелерінің бірі “TCG Oruçreis-тің” ең басты ерекшелігі — оның отандық және ұлттық қорғаныс технологияларымен жан-жақты жаңғыртылып, болашақтың шайқас қажеттіліктеріне сай деңгейге жеткізілуі екенін айтты.

Полковник Варлы “TCG Oruçreis” кемесін жаңғырту жұмыстары 2025 жылы сәтті аяқталғанын атап өтіп, "Жаңғырту аясында “TCG Oruçreis” жетілдірілген шайқасты басқару жүйесімен, жаңа буын радарларымен, электронды соғыс мүмкіндіктерімен, сенсорлармен, байланыс инфрақұрылымымен және командалық-басқару жүйелерімен жабдықталып, заман талабына сай қайта құрылымдалды", — деген сөздерді жеткізді.

Полковник Варлы АҚШ-тың құрылғанына 250 жыл толуы мерекесі аясында жоспарланған бұл сапар Түркияның НАТО құрамындағы белсенді рөлі мен халықаралық теңіз қауіпсіздігіне қосып жатқан үлесін тағы бір мәрте дәлелдейтінін білдірді.

Аталған шараға 20-дан астам ел әскери және тарихи кемелерімен қатысты.

"Барбарос" класына жататын “TCG Oruçreis” фрегаты Түрік әскери-теңіз күштерінің құрамына 1997 жылы қабылданған болатын.

Кеменің 8 шілдеде Нью-Йорктан Дублинге қарай жол тартуы жоспарлануда.