Сирия АҚШ-тың араағайындығымен Израильмен шиеленісті бәсеңдетуге бағытталған жоғары деңгейдегі келіссөз өткенін хабарлады.
Сирия Сыртқы істер министрлігіндегі дереккөздердің «SANA» агенттігіне мәлімдеуінше, Сыртқы істер министрі Асад Хасан Шайбани бастаған делегация Израиль өкілдерімен Иорданияда кездескен.
Келіссөз Израильдің соңғы әуе соққыларынан кейін Сирия аумағындағы шиеленісті азайту және Сирия мен аймақтағы тұрақтылықты қолдау мақсатында өткізілді.
Сирияның әскери барлау басшылары қатысқан кездесуде Израиль шабуылдарын, ұстап әкету әрекеттері мен нысанаға бағытталған операцияларды тоқтатудың нақты жолдары талқыланды.
Кездесуден кейінгі мәлімдемеде келіссөз үдерісін қайта жандандыру арқылы болашақта кең ауқымды келісімге негіз болатын қауіпсіздік келісіміне қол жеткізу көзделетіні айтылды.
Сондай-ақ Сирияның егемен мемлекет екені, ұлттық мүдделеріне сай өз армиясын қайта құруға, дамытуға, одақтастары мен серіктестерін өзі айқындауға толық құқығы бар екені атап өтілді. Дамаск бұл егемен құқықтарды шектейтін қандай да бір келісімге келіспейтінін мәлімдеді.
Кездесуде Сирия оккупацияланған Голан жоталарын өз аумағы деп санайтынын қайталап, Голанның түпкілікті мәртебесін талқылауға әлі ерте екенін жеткізді. Ал қазіргі басты міндет Израиль күштерінің 2024 жылдың 8 желтоқсанына дейінгі шепке шегінуі, 1974 жылғы Күштерді ажырату туралы келісімді қайта күшіне енгізу және оны толық орындау екені атап өтілді.
