АҚШ-тың Нью-Йорк қаласындағы Таймс-скверде бір әйелді пышақтап өлтіріп, бір ер адамды жаралаған әйел полицияның оғынан қаза тапты.

Нью-Йорк полициясының комиссары Джессика Тиштің журналистерге берген мәліметіне сәйкес, 49 жастағы әйел Таймс-скверде сауда сөмкесінен екі пышақпен айналадағы адамдарға шабуыл жасаған.

Шабуыл жасаған әйел алдымен метро станциясынан шыққан 68 жастағы ер адамды, артынша 32 жастағы әйелді іш тұсынан пышақтаған.

Ауруханаға жеткізілген әйел алған жарақаттарынан көз жұмды, ал ер адамның емі жалғасып жатыр.

Куәгерлер түсірген бейнежазбалардан әйелді кемінде 10 полиция қызметкері қоршап алғанын көруге болады. Ол қолындағы пышақтарды тастаудан бас тартып, тәртіп сақшыларына қоқан-лоқы көрсеткен.

Электрошокер қолданылғанына қарамастан тоқтамаған әйел пышақ ұстап полиция қызметкерлеріне қарай ұмтылған. Осы кезде екі полиция қызметкері оқ атып, оны жаралаған.

Оқиға орнында қолына кісен салынып, алғашқы медициналық көмек көрсетілген әйел ауруханаға жеткізілгенімен, кейін сол жерде көз жұмды.

Билік өкілдері оқиғаның терроризммен байланысын көрсететін ешқандай дәлел табылмағанын және тергеу басталғанын мәлімдеді.