Түркия Президенті Режеп Тайып Ердоған Нидерланд Королі Виллем-Александр мен оның жұбайы ұйымдастырған кешкі ас кезінде АҚШ Президенті Дональд Трамппен кездесті. Бұл шара НАТО Мемлекет және Үкімет Басшыларының Саммитіне қатысушы көшбасшылар мен олардың жұбайлары құрметіне өткізілді.
Анадолы агенттігінің мәліметінше, Ердоған мен Трамп Гаагада өткен НАТО саммиті аясында аймақтық, жаһандық мәселелер мен екіжақты қарым-қатынастарды талқылады.
Түркия Президенті АҚШ Президенті Трамптың күш-жігерімен қол жеткізілген Израиль мен Иран арасындағы атысты тоқтату келісімін құптап, тұрақты бейбітшілік орнатуға, Газа аймағындағы геноцидті тоқтатуға және Ресей-Украина соғысы бойынша диалогқа шақырды.
“Ердоған АҚШ-пен энергетика, инвестиция және қорғаныс салаларындағы ынтымақтастықтың зор әлеуетін атап өтіп, екіжақты қарым-қатынастарды нығайту 100 миллиардтық долларлық сауда мақсатына жетуге көмектесетінін айтты», – деп хабарлады Анадолы агенттігі.
Екі көшбасшы НАТО-ның басты одақтастары ретінде Альянстың қорғаныс әлеуетін нығайтудың маңыздылығын атап өтті.
TRT World тілшісі Хасан Абдулланың Гаагадан хабарлауынша, Ердоған Трампқа Иран-Израиль арасындағы атысты тоқтату келісімін ұйымдастырғаны үшін алғыс білдіріп, Газа аймағындағы дағдарысқа алаңдаушылық білдірді.
Ердоғанға кімдер серік болуда?
Сейсенбі күні Ердоған НАТО саммитіне қатысу үшін Нидерландқа барды. Түркия Президенті Амстердамдағы Схипхол әуежайына қонып, оны Нидерланд шенеуніктері, Түркияның НАТО-дағы елшісі Басат Өзтүрік және Нидерландтағы Түркия елшісі Селчук Унал қарсы алды.
Кейін ол саммит өтіп жатқан Гаага қаласына барды. Президенке Түркияның бірінші ханымы Емине Ердоған, Сыртқы істер министрі Хакан Фидан, Ұлттық Қорғаныс министрі Яшар Гүлер, Ұлттық барлау ұйымының басшысы Ибрахим Калын, Президенттік аппарат жанындағы Коммуникация басқармасы басшысы Фахреттин Алтун және Ердоғанның сыртқы саясат пен қауіпсіздік жөніндегі кеңесшісі Акиф Чағатай Кылыч серік болуда.
Емине Ердоған Король сарайында өткен кешкі ас кезінде Түркия көшбасшысының жанында болды.
Түркия Президенті саммит барысында бірнеше басшымен екіжақты кездесулер өткізеді деп жоспарланды. Саммитте Еуро-Атлантикалық аймаққа төнетін стратегиялық қауіптер мен қатерлер талқыланады.
Екі күндік НАТО саммиті сәрсенбі күні аяқталады.
