Израиль оппозициясының лидері Яир Лапид сәрсенбі күні АҚШ пен Иран арасындағы уақытша атысты тоқтату келісімін қолдағаны үшін Нетаньяхуды қатаң сынап, бұл жағдайды «саяси және стратегиялық сәтсіздік» деп атады.

Лапид “Х” желісіндегі мәлімдемесінде: «Біз тарихымызда мұндай үлкен саяси апатты көрген емеспіз. Ұлттық қауіпсіздігіміздің өзегіне қатысты шешімдер қабылданғанда, Израиль ол жерде тіпті болған да жоқ», — деген пікір білдірді.

Лапид Нетаньяхудың «тәкаппарлығы, салғырттығы және стратегиялық жоспарлаудың жоқтығы» салдарынан келген зардапты жою үшін жылдар қажет болуы мүмкін екенін айтты. Сондай-ақ ол армия мен халық өз міндетін атқарғанымен, үкіметтің мақсаттарына жетуде қауқарсыз болғанын баса көрсетті.

Лапид өз жазбасында: «Армия өзінен талап етілгеннің бәрін орындады, ал халық ерекше төзімділік танытты. Алайда Нетаньяху саяси және стратегиялық тұрғыдан жеңіліске қалып, өзі белгілеген ешбір мақсатқа жете алмады», — деді.

Бұл мәлімдеме Нетаньяху кеңсесінің АҚШ президенті Дональд Трамптың Иранға қарсы әскери шабуылдарды екі аптаға тоқтата тұру туралы шешімін қолдайтынын жариялағаннан кейін жасалды. Дегенмен Нетаньяхудың кеңсесі бұл екі апталық бітімнің «Ливанды қамтымайтынын» алға тартты.

Еске сала кетсек, Трамп сейсенбі күні Иранды бомбалау мен шабуылдарды «екі аптаға тоқтата тұру» туралы келісімге келгендерін хабарлаған болатын.