Екі ел басшысы сауда қатынастарын талқылаған әңгімесінде Трамп Үндістан премьер-министрінің Жаңа Делидің Ресейден мұнай сатып алуын шектеуге уәде бергенін мәлімдеді.

Сейсенбі күні Ақ Үйде журналистерге сөйлеген Трамп: “Көптеген тақырыпты талқыладық, бірақ негізінен сауда саласы туралы әңгіме болды,” - деді.

Ол сондай-ақ энергетика мәселесінің де талқыланғанын айтып, Модидің Үндістанның Ресейден мұнай импортына шектеу қоятынына сендіргенін жеткізді.
“Олар Ресейден тым көп мұнай сатып алмайды. Ол да бұл соғыстың мен сияқты тезірек аяқталуын қалайды,” -деді Трамп.

Қазіргі таңда Үндістан мен Қытай — Ресейдің теңіз арқылы экспорттайтын шикі мұнайының ең ірі екі сатып алушысы.

Трамптың қысымы

Соңғы уақытта Трамп Үндістанды Ресейден мұнай сатып алғаны үшін сынға алып, бұл импортына тосқауыл қою мақсатында АҚШ-қа жасалатын үнді экспортына кедендік тарифтер енгізді. Бұл қадам Трамптың Мәскеуді Украинада бейбіт келіссөз жүргізуге мәжбүрлеуге тырысып жатқан кезеңіне тұспа-тұс келді.

Бұған дейін ол Үндістан Ресейден мұнай алуды тоқтатпаса, үнді тауарларына “жоғары кедендік баж салығын” енгізу қаупін төндірген еді.

Вашингтонның пікірінше, Ресеймен жалғасып жатқан энергетикалық сауда Мәскеуді экономикалық оқшаулауға бағытталған халықаралық күш-жігерге нұқсан келтіреді және жанама түрде соғыс әрекеттерін қаржыландырады.

Украинадағы соғыс басталғалы бері Үндістан арзандатылған ресейлік шикі мұнайдың ең ірі сатып алушыларының бірі болды, бұл сауда елдің ішкі энергия шығындарын теңестіруге көмектесіп отыр.

Трамп әкімшілігі биылдың басында Үндістаннан әкелінетін тоқыма, фармацевтика және автокөлік бөлшектері сияқты өнімдерге 50%-ға дейін жететін кедендік салық енгізіп, екіжақты сауда қатынастарын одан әрі шиеленістірді.

Трамп Үндістан Ресейден мұнай импортын азайтпаса, бұл тарифтердің сақталатынын немесе одан әрі арттырылатынын ескертті.