Турнирде “Е” тобын 6 ұпаймен көшбасшы ретінде аяқтап, 12 жылдық үзілістен кейін кубокты тағы да иеленгісі келген Германия мен құрамында Түркия да бар “D” тобында 4 ұпаймен 3-орынға тұрақтаған Парагвай Бостон стадионында күш сынасты.
Германия құрамасында «Галатасарай» сапында өнер көрсететін Лерой Сане маңызды кездесуді алғашқы минуттардан бастады.
Матчтың 2-минутында Парагвай орындаған бұрыштама добынан кейін Алонсо сол аяғымен соққы бағыттады, алайда қақпашы Нойер жақын қашықтықтан гол соғуға мүмкіндік бермеді. Одан кейін доп Алонсоның өзінен сыртқа кетті.
8-минутында Германия сапынан Павловичтің артқы бағанаға қарай бағыттаған добын Виртц қабылдап соққы жасағанымен, доп қақпа маңдайшасынан биік ұшты.
42-минутында Парагвай 1:0 есебімен алға шықты. Парагвайлық Альмиронның айып алаңының сыртына шығарған пасын алған Галарзадан кейін Энцисо баспен соққы жасап, допты сол жақ бұрышқа дәл тоғытты.
Осылайша Парагвай бірінші таймды 1:0 есебімен өз пайдасына аяқтады.
54-минутында Германия таразы басын теңестірді (1:1). Сол қанаттан берілген пасты сәтті іліп әкеткен Виртц пенальти нүктесіне қарай доп асырды. Оған бірінші жеткен Хавертц баспен соққы бағыттап, допты қақпаның оң жақ бұрышында тулатты.
Матчтың негізгі 90 минуты 1:1 есебімен аяқталып, кездесу қосымша уақытқа ұласты.
Осы оқиғадан кейін Германия Әлем чемпионаты тарихында ең көп қосымша уақыт ойнаған командаға айналды (12 матч). Германиядан кейінгі орындарда Аргентина мен Италия (11) және Англия (10) тұр.
Қосымша уақыттың 102-минутында Германия сапынан Тах баспен гол соққан еді, алайда “VAR” жүйесін тексеру барысында неміс футболшысы Антонның қақпашы Гиллге кедергі жасағаны анықталып, гол есепке алынбады.
Қосымша уақытта да теңдік бұзылмаған соң, сериялы пенальти ату кезеңіне көшті. Парагвай пенальти сериясында 4:3 есебімен басым түсіп, 1/8 финалға өтті.
Германия турнир тарихында алғаш рет пенальти сериясында жеңілді
Германия құрамасы Әлем чемпионаты тарихында бірінші рет пенальти сериясы бойынша матчта есе жіберді.
Ал Германияны негізгі және қосымша уақыты 1:1 аяқталған ойынның пенальти кезеңінде 4:3 есебімен тізе бүктірген Парагвай 1/8 финалға көтерілді. Парагвай келесі кезеңде Франция–Швеция жұбының жеңімпазымен кездесетін болады.
Германияның 2018 және 2022 жылдардан кейін 2026 жылы да бағы жанбады Соңғы екі Әлем чемпионатында (2018, 2022) топтық кезеңнен шыға алмай сәтсіздікке ұшыраған «неміс машиналары» 2026 жылы да 1/16 финалда жарыс жолынан шығып, тағы бір сәтсіз нәтижені тіркеді. Айта кетейік, немістер бұған дейін 1954, 1974, 1990 және 2014 жылдары Әлем чемпионы атанған болатын.
