БҰҰ Бас хатшысының баспасөз хатшысы Стефан Дюжаррик күнделікті баспасөз мәслихатында мәлімдеме жасады.
«28 қыркүйекте Ракхайн штатында 50 адамның қаза тауып, 60-қа жуық адамның жаралануына әкелген әуе шабуылы туралы хабарға алаңдаушылық білдіреміз», – деді Дюжаррик. Ол БҰҰ Бас хатшысының шабуылды қатаң айыптағанын жеткізді.
Дюжаррик жараланғандардың басым бөлігінің жағдайы ауыр екенін атап өтіп, қаза тапқандардың отбасыларына көңіл айтты.
Оның сөзінше, БҰҰ Бас хатшысы Гутерриш барлық тарапты зорлық-зомбылықты дереу тоқтатуға шақырды. Сондай-ақ ол әуе шабуылына жауапты тұлғалар жауапқа тартылуы тиіс екенін атап өтті.
Бұған дейін БҰҰ-ның Адам құқықтары жөніндегі Жоғарғы комиссары Фолькер Тюрк те Мьянманың Ракхайн штатында базар маңына жасалып, кемінде 50 адамның қаза табуына әкелген әуе шабуылын айыптаған болатын.
