АҚШ президенті Дональд Трамп «Қажет болса Данияға қарасты Гренландияны бақылауға алу үшін әскери күш қолданамыз», - деп мәлімдеді.

«Мен мұны жоққа шығармаймын. Мен мұны істеймін деп айтпаймын, бірақ ешқандай мүмкіндікті жоққа шығармаймын», - деді Трамп «NBC» арнасына берген сұқбатында.

«Бізге Гренландия шынымен керек», - деді. Трамп Данияға қарасты автономиялық аймақтың «халықаралық қауіпсіздік» үшін қажет екенін алға тартты. «Гренландияда адам саны аз. Біз оларға қамқорлық жасаймыз», - деп қосты ол.

Қаңтар айында қызметіне кіріскелі АҚШ президенті Трамп Данияның қарсылығына қарамастан Гренландияны сатып алғысы келетінін жиі айтуда.

Стратегиялық маңызы

Гренландия 18 ғасырдан бері Дания Корольдігінің бір бөлігі және 1979 жылы автономия мәртебесін алды. Солтүстік Мұзды және Атлант мұхиттарының арасындағы аралдың стратегиялық тұғыры мен жер асты ресурстарына байланысты маңызы зор.

Дания да, Гренландия да аралды сату туралы кез келген ұсыныстан үзілді-кесілді бас тартты. Қаңтарда жүргізілген сауалнама Гренландия тұрғындарының 85%-ы АҚШ-қа қосылуға қарсы екенін көрсетті.

Наурызда сайланған Гренландияның премьер-министрі Йенс-Фредерик Нильсен Еуропа елдеріне үндеу жасап, аралдың сатылмайтынын баса айтты.

«Бізбен бірге болыңыз және Гренландияның ешқашан сатылмайтынын түсіндіріңіз. Гренландияны гренландиялықтар басқарады және бұл ешқашан өзгермейді», - деді Нильсен Анадолы агенттігіне берген сұқбатында.