Американың ең ықпалды қара нәсілді белсенділерінің бірі,  пастор Джесси Джексон бақилық болды. Джексон 84 жаста еді.

Баптист уағызшысы болған Джексон 1960 жылдардан бастап, яғни Мартин Лютер Кингпен бірге шерулерге шығып, осы жолда қаржы жинауға көмектескен кезден бері азаматтық құқықтар қорғаушысы ретінде танылды.

Джексонның отбасы «Әкеміз тек отбасымыз үшін ғана емес, әлемдегі бүкіл езілгендер, даусы шықпайтындар мен еленбейтіндер үшін қызмет еткен көшбасшы болды», — деді. Сондай-ақ олар «Оның әділдікке, теңдікке және сүйіспеншілікке деген мызғымас сенімі миллиондаған адамды жігерлендірді. Біз  оның өмір бойы күрескен құндылықтарын жалғастыру арқылы оның есімін құрметтеуді өтінеміз», — деп қосты.

Мықты шешен және халықаралық дау-дамайларда табысты бітімгер болған баптист пастор алпыс жылдан астам уақыт бойы афроамерикалықтардың құқықтары үшін күресті. 2009 жылы Барак Обама билікке келгенге дейін Джексон 1980 жылдары Демократиялық партия атынан екі рет президенттікке үміткер болып, АҚШ президенттігі үшін жарысқан ең танымал қара нәсілді тұлға болды.