“Yonhap” агенттігінің мәліметінше, Оңтүстік Корея Сыртқы істер министрлігі таратқан мәлімдемеде: «Солтүстік Корея мен Ресей арасындағы әскери ынтымақтастыққа қатысты оқиғалардың дамуын жіті бақылап отырмыз», – делінген.
Мәлімдемеде сондай-ақ БҰҰ Қауіпсіздік кеңесінің қарарларын бұзатын Солтүстік Корея–Ресей әскери ынтымақтастығын дереу тоқтатуға қайта шақырды.
Ал үкіметтегі дереккөздер әзірге Солтүстік Кореяның Ресейге қосымша әскер жібергенін растайтын ешқандай белгі анықталмағанын мәлімдеді.
Украина президенті Владимир Зеленский 25 шілдеде жасаған мәлімдемесінде Солтүстік Корея Ресейге қосымша 30 мың әскери қызметкер жіберуді жоспарлап отырғанын, сондай-ақ баллистикалық зымырандарды ұшыру қондырғыларын да жөнелтуге дайындалып жатқанын айтқан болатын.
Сеул билігінің бағалауынша, Солтүстік Корея осы уақытқа дейін Ресейге қолдау көрсету мақсатында шамамен 20 мың әскери қызметкер мен әскери инженерді жіберген. Олардың 14 мыңға жуығы майдан шебінде қызмет атқарып жүр деп есептеледі.
Сонымен қатар Солтүстік Кореяның Сыртқы істер министрі Чхве Сон Хуидің 19–20 шілде күндері Мәскеуде Ресей президенті Владимир Путин және Сыртқы істер министрі Сергей Лавровпен кездесуі екі ел арасындағы әскери ынтымақтастықтың одан әрі күшеюі мүмкін деген пікірлерді күшейтті.
