Ресейдің Румыниядағы елшілігі елші оқиғаға байланысты Бухарестегі Сыртқы істер министрлігіне шақыртылғаннан кейін Румыния әуе кеңістігіндегі ұшқышсыз ұшақ шабуылын «Украинаның арандатуы» деп атады.
Елші Владимир Липаев Румынияның айыптауын «негізсіз» деп атап өтті. Елшіліктің мәлімдемесінде: «Барлық дерек мұның Киев режимі ұйымдастырған әдейі арандату екенін көрсетіп отыр» делінген.
Ресейдің Украина шекарасына жақын инфрақұрылымға жасаған шабуылы кезінде бір ұшқышсыз әуе аппараты Румыния әуе кеңістігін бұзған соң Румыния жойғыш ұшақтарын әуеге көтерді. Қорғаныс министрі Иоанут Мостяну «F-16» ұшқыштарының төмен ұшқан ұшқышсыз әуе аппаратын атып түсіруге аз қалғанын, бірақ аппараттың әуе кеңістігінен шығып, Украинаға қарай бет алғанын айтты.
Польша НАТО одақтастарының қолдауымен өз әуе кеңістігіндегі орыстың ұшқышсыз әуе аппараттарын атып түсіргеннен кейін үш күн өткен соң Польша да қорғаныс мақсатында шекара маңына ұшақ жіберіп, шығыстағы Люблин қаласының әуежайын жапты.
Еуропалық Одақ пен НАТО-ға мүше, әрі Украинамен 650 шақырым көлеміндегі шекараны бөлісетін Румыния соғыс бастағалы бері өз аумағына бірнеше рет Ресейдің ұшқышсыз әуе аппараттары бөлшектерінің құлағанын хабарлаған. Сенбі күні қауіптің алдын алу үшін Румыния екі «F-16» мен екі «Eurofighter» жойғыш ұшағын әуеге көтерді. Қорғаныс министрлігі Дунай өзені мен Украина шекарасына жақын Тулча облысының тұрғындарына бомбадан қорғану туралы ескерту жасады.
Министрлік жойғыш ұшақтардың ұлттық әуе кеңістігінде бір ұшқышсыз ұшақты анықтап, оны Чилия-Вече ауылынан оңтүстік-батысқа қарай 20 шақырым жерде радардан жоғалғанға дейін бақылағанын хабарлады.
Украина Президенті Владимир Зеленский «X» әлеуметтік платформасындағы мәлімдемесінде дронның Румыния шекарасына шамамен 10 шақырым кіріп, НАТО әуе кеңістігінде 50 минуттай әрекет еткенін атап өтті. Ол: «Бұл – Ресейдің соғысты ашық түрде кеңейтуі. Олар дәл осылай әрекет етуде. Ресейге қарсы санкция қажет. Ресей саудасына қарсы кедендік тарифтер қажет. Ұжымдық қорғаныс қажет», – деді.
НАТО Польша әуе кеңістігін бұзған ұшқышсыз әуе аппараттарын атып түсіргеннен кейін жұма күні Еуропаның шығыс қапталындағы қорғанысты күшейтуді жоспарлап отырғанын мәлімдеді. Польша ұшқышсыз әуе аппараттарын атып түсіру арқылы соғыс басталғалы Батыс одағының мүшесі жасаған алғашқы қарулы әрекетке барды.
