Әзірет Мұхаммедтің дүниеге келуіне байланысты хижри күнтізбесі бойынша раби әл-әууәл айының 12-сі күні атап өтілетін Мәуліт түні ислам қоғамында ғасырлар бойы тойланып келеді.
Сөздікте «туған жері мен уақыты» деген мағынаны білдіретін мәуліт ислам мәдениетінде әсіресе Әзірет Мұхаммедтің дүниеге келуін, осы аяда өткізілетін шаралар мен жазылған шығармаларды сипаттау үшін қолданылады.
Әзірет Мұхаммедтің туғанына 1501 жыл толуы биыл «Пайғамбарымыз және көркем мінез» тақырыбымен атап өтіледі.
Түркия Дін істері басқармасы биыл да «Мәуліт ән-Наби апталығы» аясында ел ішінде және шетелде көптеген іс-шара өткізеді.
«Мәуліт түні — Мұхаммед пайғамбар ұстанымдарының қайта жаңғыруы»
Дін істері жоғары кеңесінің маманы Хүсейн Ары Әзірет Мұхаммедтің туған күні ислам қоғамдарында ғасырлар бойы сағынышпен, алғыспен әрі зор қуанышпен тойланып келе жатқанын айтты.
Түркияда өткізілетін мерекелік шараларда Сүлеймен Челебидің мәуліт қасидасы оқылып, уағыздар мен сұхбаттарда көркем мінез-құлық баяндалып, жүректердегі Пайғамбар сүйіспеншілігі жаңғыратынын білдірген Ары сөзін былайша жалғастырды:
«Мәуліт түні мен Мәуліт ән-Наби апталығы — бұл жай ғана тарихи туған күнге тағзым ету емес, Мұхаммед пайғамбар алып келген әділдік, мейірімділік пен ахлақ ұстанымдарын қайта жаңғырту. Әділдік сезімі әлсіреп, мейірімнің орнын уақыт өте келе ашу мен зомбылық басып, өзімшілдік пен пайдакүнемдік адамдар арасындағы қарым-қатынасты торлаған мына әлемде пайғамбарлық ахлаққа әдеттегіден де көп мұқтаждық бар».
Мәуліт ән-Наби апталығы Пайғамбардың өз үмбетіне бірауыздылық пен бауырластық туралы айтқан аманатын қайта еске түсіруге септігін тигізетінін жеткізген Ары: «Бастысы Газада және әлемнің түрлі аймақтарында зұлымдық көріп жатқан адамдардың құтылуы тек мұсылмандардың Пайғамбардың көркем мінез-құлығы төңірегінде бірігіп, бірге болуымен ғана мүмкін», — деді.
«Алла елшісінің көркем мінезін бойға сіңіру — мұсылмандар үшін бұлтартпас жауапкершілік»
Дін істері басқармасының Мәуліт ән-Наби апталығы үшін белгілеген «Пайғамбарымыз және көркем мінез» тақырыбы заман талабы тұрғысынан өте маңызды екенін баса айтқан Ары мынаны атап өтті:
«Алла елшісінің көркем мінезін бойға сіңіру және иманның, ғибадат пен ахлақтың ажырамас байланысын қайта орнату — мұсылмандар үшін бұлтартпас жауапкершілік. Бүгінгі адамзаттың рухани дерттерінің бірден-бір дауасы — Пайғамбарымыздың (с.а.у.) көркем мінезін өнеге ету».
