Украина президенті Владимир Зеленский Ресей мен Украинаның соғысын тоқтатуға бағытталған ықтимал бейбіт келісімнің ең күрделі тұстары тікелей АҚШ президенті Дональд Трамппен талқыланатынын айтты.

Зеленский “Х” әлеуметтік желісінде жариялаған үндеуінде: «Бүгін біздің делегация Женевада АҚШ тарапы және еуропалық әріптестермен өткен келіссөздерден оралды. Енді соғысты аяқтау үшін қажет қадамдардың тізімі нақты болуы мүмкін. Женевадан кейін тармақтар азайды және осы шеңберге қатысты көптеген дұрыс элемент ескерілді», -деді.

Кез келген шеңберді түпкілікті бекітпес бұрын әлі орындалуы тиіс жұмыс бар екенін айтқан Зеленский «Командамыз жаңа жоба туралы баяндады және бұл шынымен дұрыс бағыт. Даулы мәселелерді президент Трамппен талқылаймын», - деп қосты.

Зеленский бөлек жазбасында серіктестермен жүргізіліп жатқан «нәтижелі жұмыстың» әлі де маңызды екенін атап, Ресейдің қысымды жалғастыратыны жөнінде ескертті.

Ақ Үй Вашингтон мен Киев арасындағы келіссөздердің әлі де нәтижелі жалғасып жатқанын, бірақ тараптар арасында кейбір мәселелер бойынша айырмашылықтар бар екенін растады.

АҚШ баспасөз хатшысы Кэролайн Левитт президент Трамптың келісімге қол жеткізуге болатынына оң көзқарас білдіргенін мәлімдеді. Оның айтуынша, Трамп Ресейді жақтайды деген сындар, оның ішінде республикалық партия ішіндегі пікірлер шындыққа сай емес.