Түрік Қызыл Жарты Ай қоғамы Судандағы босқын лагерьлеріндегі мұқтаж 1000 отбасыға азық-түлік  жеткізді.

Түрік Қызыл Жарты Ай қоғамының жазбаша мәлімдемесіне сәйкес, ұйымның Судандағы өкілдігі Судан Қызыл Жарты Ай қоғамымен бірлесіп, Порт-Суданда мұқтаж отбасыларға көмек көрсету жұмыстарын жалғастырып жатыр.

Суданда жүргізілген қажеттіліктерді анықтау жұмыстарының нәтижесінде дайындалған азық-түлік қораптары алты адамнан тұратын отбасының шамамен бір айлық қажеттілігін өтеуге арналған.

26–27 шілде күндері ел ішінде қоныс аударуға мәжбүр болғандар көп шоғырланған 10 лагерьде жалпы 1000 азық-түлік қорабы мұқтаж отбасыларға таратылды.

Көмек тарату барысында Судан Қызыл Жарты Ай қоғамының еріктілері мен Түрік Қызыл Жарты Айының қызметкерлері үйлесімді жұмыс істеп, көмектің ең мұқтаж отбасыларға жетуін қамтамасыз етті.

Азық-түлік көмегі арқылы отбасылардың күнделікті қажетті негізгі азық-түлік қорын белгілі бір уақытқа қамтамасыз ету көзделіп отыр.

Судандағы гуманитарлық қажеттіліктерге байланысты көмек операциясының келесі кезеңінде Хартум мен Солтүстік Кордофан аймақтарында да азық-түлік тарату жоспарланған.

Мақсат  ̶  гуманитарлық көмек жұмыстарын өзге өңірлерге де кеңейтіп, көбірек мұқтаж отбасыға қолдау көрсету.

Түрік Қызыл Жарты Ай қоғамы Суданда жүзеге асырып жатқан азық-түлік бағдарламасы арқылы қақтығыстардан зардап шеккен отбасылардың негізгі қажеттіліктерін өтеуге үлес қосып, елдегі гуманитарлық көмек жұмыстарын Судан Қызыл Жарты Ай қоғамымен бірлесіп жалғастыруды жоспарлап отыр.