Түркия Сыртқы істер министрі Хакан Фидан Иранға бағытталған әуе шабуылдары үкіметтің құлауына себеп болмайтынын білдіріп, әскери іс-қимылдар режимді өзгерте алады деген пайымдауларды жоққа шығарды.
Фидан дүйсенбі күні «CNN Türk» арнасына берген сұхбатында Иран үкіметі құлату мақсатымен нысанаға алынған жағдайда жойыла ма? деген сұраққа: «Жоқ, құламайды», — деп жауап берді.
«Иранға қатысты белгілі сценарийлерді айтқым келмейді, бірақ әуе шабуылымен немесе басқа нәрсемен режим өзгермейді. Бұл — бос қиял», — деді ол.
Фидан әскери іс-қимыл мемлекетті әлсіретуі мүмкін екенін, бірақ режимнің ауысуына әкелмейтінін де қоса кетті. Министр «Мынадай жағдай болуы мүмкін: үкімет әлсірейді, жүйе әлсірейді, халыққа қызмет көрсете алмайтын күйге түседі. Содан кейін қазіргі режим әлдеқайда радикалды шешімдер қабылдап, түзетуді таңдауы мүмкін. Трансформациялануы мүмкін», — деді.
Анкараның дипломатиялық марафоны
Бұл мәлімдемелер Иран мен АҚШ сегіз айға жуық үзілістен кейін жұма күні Оманда қайта басталған келіссөздердің келесі кезеңіне дайындалып жатқан тұста жарияланды.
Иран төңірегіндегі шиеленістердің халықаралық күн тәртібінде негізгі орында тұрғанын атап айтқан Сыртқы істер министрі аймақтың тағы бір қақтығысқа төтеп бере алмайтынын ескертті.
«Президентіміз Режеп Тайып Ердоған да бұл мәселеде барынша мұқият болып отыр. Сондықтан ықтимал соғыстың алдын алудың барлық мүмкіндіктерін пайдаланғымыз келеді», — деді ол.
Фидан Иран Сыртқы істер министрі Аббас Аракчидің келіссөздер туралы өзіне ақпарат бергенін және Анкараның АҚШ тарапымен де байланыста екенін атап өтті.
Жағдайды «тез арада шешудің қиын екенін» білдірген Хакан Фидан соған қарамастан тараптар арасында келіссөздерді жалғастыруға деген айқын ниет бар екенін баса айтты.
