АҚШ президент Дональд Трамптың 20 тармақтан тұратын Газа бейбітшілік жоспарын қолдауға бағытталған және Халықаралық тұрақтылық күшін бекітуді қамтитын БҰҰ Қауіпсіздік Кеңесінің қарар жобасын серіктес елдерге ұсынғанын хабарлады.

АҚШ миссиясының өкілі сәрсенбі күні жасаған мәлімдемесінде АҚШ елшісі Майк Уолтцтың бұл жобаны Қауіпсіздік Кеңесінің 10 мүшесімен, сондай-ақ Түркия, Мысыр, Катар, Біріккен Араб Әмірліктері мен Сауд Арабиясы сияқты аймақтық әріптестермен бөліскенін айтты.

Қарар жобасын дауысқа салу күні әзірге белгілі емес.
АҚШ-тың мәлімдемесінде бұл жоба Трамптың 20 тармақтан тұратын жоспарында көзделген және оның басшылығымен құрылатын Газадағы уақытша басқару органы «Бейбітшілік кеңесін» құптайтыны атап өтілді.

Қарар сонымен қатар бейбітшілік жоспарында қарастырылған Халықаралық тұрақтылық күшіне өкілеттік беруді де қамтиды.

Дипломатиялық дереккөздерге сүйенсек, бірнеше ел  Халықаралық тұрақтылық күшінің құрамына қосылуға дайын екенін мәлімдеген, алайда Палестинаға әскер жібермес бұрын Қауіпсіздік Кеңесінің шешімін күтуде.

АҚШ өкілі: «Америка Құрама Штаттары президент Трамптың басшылығымен БҰҰ аясында шексіз пікірталас емес, нақты нәтижелерге қол жеткізетін болады», - деді.

Халықаралық күш құру бастамасы 10 қазандағы Израиль мен ХАМАС ұйымы арасындағы атысты тоқтату келісімінің басты тетіктерінің бірі ретінде бағаланып отыр.

Келісімге сәйкес, әскерлердің басым бөлігі араб және мұсылман елдерден таңдалып, Газадағы қауіпсіздікті бақылау үшін орналастырылады.

АҚШ өкілі: «Тараптар ондаған жыл бойы төгілген қанды тоқтатып, АҚШ президентінің Таяу Шығыстағы тұрақты бейбітшілік жөніндегі көзқарасын жүзеге асыру үшін осы тарихи мүмкіндікті пайдаланды», - деді.

Трамп жоспарының келесі кезеңі Израильдің Газадан әскер шығаруын, ХАМАС қозғалысының қарусыздандырылуын және Палестинада қираған елді мекендердің қайта қалпына келтірілуін көздейді.