АҚШ-та Конгрестегі саяси күштердің арақатынасын айтарлықтай өзгертуі мүмкін 2026 жылғы аралық сайлауға дауыс беру басталды.
Президент Дональд Трамптың екінші билік мерзімінің орта тұсына тұспа-тұс келген бұл сайлау Республикашыл партия мен Ақ Үйдің саяси болашағы үшін маңызды сынақ болмақ.
Экономика мен Иранмен соғыс – сайлаудың басты мәселелері
Сайлаушылардың таңдауына әсер ететін негізгі мәселе – қымбатшылық. Трамп әкімшілігінің жоғары кедендік баж салығын енгізуі және Иранмен арадағы әскери қақтығыстар салдарынан азық-түлік пен жанармай бағасының өсуі халықтың наразылығын күшейтті.
Сайлау қарсаңында дизель отынының бір галлоны 3,75 доллар болса, қыркүйек айында оның бағасы 6,52 долларға жетіп, тарихи рекорд орнатты. Ал инфляция деңгейі Трамп билікке келген кезде 3 пайыз болса, қазір 3,7 пайыз.
Республикашылдар қиын жағдайға тап болды
Халық арасындағы қолдау деңгейі 38 пайыз төмендеген Трамп соңғы апталарда партияластарына қолдау көрсету мақсатында сайлауалды митингілерді жиі өткізді. Алайда экономикалық жағдайдың нашарлауы Республикашыл партия басымдыққа ие Канзас, Айова және Техас штаттарының өзінде сайлау бәсекесінің күшеюіне әкелді.
Трамп митингілерде сайлаушыларға тікелей үн қатып, «Бұл сайлауда сіздерден өтінерім, дауыс беру бюллетенінде менің атым тұрғандай дауыс беріңіздер», – деп, жақтастарын сайлауға белсенді қатысуға шақырды.
Өкілдер палатасы мен Сенаттағы орындар үшін күрес
Қоғамдық пікір сауалнамалары экономикалық жағдайға халықтың көңілі толмауы демократтардың мүмкіндігін арттырып, Өкілдер палатасындағы көпшілік орынның ауысуына ықпал етуі мүмкін екенін көрсетеді.
Алайда Демократиялық партияны қолдайтын сайлаушылар үлесінің небәрі 29 пайыз болуы республикашылдарға көңілі толмаған азаматтардың демократтар жағына өтер-өтпесіне қатысты күмән туғызады.
35 орын қайта сайланатын Сенатта демократтар көпшілік орынға ие болу үшін кемінде төрт қосымша орын жеңіп алуы қажет.
Сайлау нәтижесіне шешуші ықпал етуі мүмкін штаттар қатарында Мичиган, Техас, Огайо, Айова, Мэн, Аляска және Солтүстік Каролина бар.
Егер Өкілдер палатасындағы басымдық демократтарға өтсе, Трамптың заңнамалық бастамаларына тосқауыл қойылып, үкімет мүшелеріне қатысты қызметтен шеттетуге бағытталған тергеулер басталуы мүмкін.
