Дүйсенбі күні Токио қаласындағы «Toyosu Fish Market» базарында өткен осы жылдың алғашқы ашық аукционында теңіз балығы рекордтық 510,3 миллион иенге (шамамен 3,2 миллион АҚШ доллары) сатылды.

Жапонияның солтүстік-шығысындағы Аомори префектурасындағы Ома жағалауында ауланған 243 кг салмақтағы тунецті «Kiyomura Corp.» компаниясы сатып алды. Бұл компания «Sushizanmai» суши желісін басқарады.

«Kiyomura» компаниясының президенті Киёши Кимура «Kyodo News» агенттігіне «Жылдың алғашқы тунец балығы сәттілік әкеледі. Оны мүмкіндігінше көп адам жеп, өздерін сергек сезінсе екен дейміз», -  деді.

Тунец «Sushizanmai» желісінің Цукидзи ауданындағы бөлімшеде бөлшектеліп, ел бойынша филиалдарға жөнелтіледі. Рекордтық бағаға қарамастан, компания балықты тұтынушыларға әдеттегі бағамен ұсынатынын мәлімдеді.

Токио әкімдігінің дерегінше, биылғы баға 1999 жылдан бергі ең жоғары баға болды.

Аукционда түрлі-түрлі тунецтер сатылып, сатушылар мен сатып алушылар арасында қызу саудаласу болды. Осы аукционды көру үшін жыл сайын көптеген шетелдік турист келеді.

Жылдың алғашқы аукционында сатып алушылар дәстүр бойынша өнімдерді жоғары бағалайды. Өйткені бұл сәттілік әкеледі деген наным бар. Сондай-ақ бұл мейрамханалар үшін маркетинг мүмкіндігі.