Жасанды интеллекттің жалған контентті шынайы етіп көрсету мүмкіндігі киберқылмыскерлердің жұмысын жеңілдетіп отыр

Цифрлық криминалистика саласының беделді сарапшысы, Калифорния университетінің профессоры Хани Фарид жасанды интеллект жасаған дауыс пен бейнені шынайы материалдан ажырата алмайтынын жеткізді.

Фаридтің мәліметінше, қарапайым адамдардың жасанды интеллект арқылы жасалған дауысты ажырату көрсеткіші шамамен 60 пайызды ғана құрайды. Оның айтуынша, мұндай нәтиже кездейсоқ болжам жасаумен пара-пар.

Жаһандық алаяқтық шығыны 442 млрд долларға жетті

«INTERPOL» жариялаған Жаһандық қаржылық алаяқтық қаупін бағалау есебіне сәйкес, 2025 жылы ЖИ алаяқтығынан 442 миллиард доллар шығын келген. Ұйым тәуекел деңгейін «жоғары» деп бағалап, алдағы 3-5 жылда жағдайдың едәуір ушығуы мүмкін екенін мәлімдеді.

АҚШ-та «FBI» жариялаған есепке сәйкес, киберқылмыстардан келген шығын 20,9 миллиард долларға жеткен. «FBI» алғаш рет жасанды интеллектке байланысты шағымдарды жеке қылмыс санаты ретінде тіркеп, 893 миллион доллардан астам шығын туралы хабарлаған 22 мыңнан астам арызды есепке алған.

Ал Ұлыбританияда адамдарды өз еркімен ақша аударуға көндіретін алаяқтық түрінен келген шығын 19 пайыз артып, 576,4 миллион фунт стерлингке жетті.

ЖИ агенттері алаяқтықты автоматтандыруда

Адамның араласуынсыз тапсырмаларды жоспарлап, орындай алатын жасанды интеллект агенттері алаяқтық әрекеттерді жаңа деңгейге шығарды. Сарапшылардың бағалауынша, жасанды интеллектке негізделген алаяқтық дәстүрлі әдістерге қарағанда 4,5 есе көп табыс әкеледі.

Олар сәтсіз әрекеттерінен сабақ алып, өз модельдерін үнемі жаңартып отырады және алаяқтық тәсілдерін өзгертіп, тиімділігін арттырады.