Түркияға сапары барысында Уитакер Түркияның НАТО- дағы рөліне және 7–8 шілдеде өтетін НАТО саммитіне қатысты мәлімдеме жасады.

Уитакер Түркияға сапары шамамен 5 күнге созылғанын, 16 мамырда Сыртқы істер министрі Хакан Фиданмен кездескенін еске салып, барлық әріптестерімен өткізген кездесулеріне қанағаттанғанын айтты.

Фиданмен кездесуінде АҚШ пен Түркия арасындағы байланыстардың беріктігі айқын көрсетілгенін жеткізген Уитакер: «Мұнда болуымның тағы бір себебі – НАТО одағын және одақтың осы өңірдегі барлық қызметін нығайтуды жалғастыру. Сапар өте жақсы өтті және мен шын мәнінде ризамын», – деді.

Түркияның НАТО-дағы рөлі

Уитакер одақтың 32 мүшесінің бірі саналатын Түркияның рөлінің «аса маңызды» екеніне назар аударып, Түркияның Косоводағы Бейбітшілік күштері миссиясы сияқты операцияларға жетекшілік етуге дайын екенін атап өтті.

Уитакер НАТО-ның Косоводағы Бейбітшілік күштерін түрік генералы басқаратынын еске салып, «Біз Түркияның көшбасшылық танытуына сенім артамыз», – деді.

Уитакер 7–8 шілдеде НАТО саммиті Түркияда өтетінін еске салып, былай деді:

«Бұл одақ үшін өте маңызды кезең болмақ. Біз барлық НАТО мүшелері үшін саммиттің нәтижелі болатынына сенімдіміз. Әсіресе бұл саммит Түркияның осы одақтың ұзақ мерзімді табысы үшін қаншалықты маңызды екенін көрсетеді. Талқыланатын көптеген маңызды мәселе бар, бірақ негізгі мақсат – 32 одақтас елдің барлығының қабілетті әрі қуатты болуын қамтамасыз ету, НАТО-ны жауынгерлік негіздеріне қайта оралатындай етіп бастапқы күйіне келтіру деп ойлаймын».

Уитакер сөзін былай жалғастырды: «Түркия – қазірдің өзінде аймақтағы өз ресурстарын қолданып келе жатқан, қажетті мүмкіндіктері мен қорғаныс өнеркәсібі бар шын мәнінде маңызды әрі үлгілі одақтас. Басқа одақтастар Түркияны үлгі тұтарлық одақтас ел ретінде қарастырса екен деймін және Түркия одаққа қосылғаннан бері соңғы 70 жыл бойы атқарып келе жатқан ісін жалғастырса екен».