Түркия Республикасының негізін қалаушы Мұстафа Кемал Ататүрік дүниеден озғанына 87 жыл толуына орай Анкарада орналасқан мазары Анытқабірде мемлекеттік рәсіммен еске алынды.
Рәсімге Түркия президенті Режеп Тайып Ердоған, Түркия Ұлы Ұлттық Мәжілісі төрағасы Нуман Куртулмуш, кабинет мүшелері, саяси партия жетекшілері, жоғары сот өкілдері және әскери қолбасшылар қатысты.
Ердоған Ататүріктің мазарына Түркия туының түсімен түстес қызыл және ақ қалампырдан жасалған гүл шоғын қойды.
Ататүріктің дүние салған уақыты жергілікті уақытпен таңғы 9:05 кезінде қатысушылар бір минут үнсіздік сақтап, кейін ұлт әнұранын орындады. Құрмет көрсету кезінде Түркия туы жартылай төмен түсірілді.
Одан кейін Ердоған және мемлкет өкілдері Мисак-и Милли мұнарасына келіп, Анытқабір естелік дәптеріне қол қойды.
«Сіз «ең ұлы еңбегіңіз» деп атаған Түркия Республикасын қорғаймыз және елдің әр түкпірін жаңа жетістіктермен дамытуды жалғастырамыз», — деп жазды Ердоған.
«Білікті және қабілетті кадрлардың басшылығымен Түркия жаһандық күшке айналу жолында сенімді қадамдармен алға басып келеді», — деп қосты ол.
Ататүрік 1938 жылғы 10 қарашада 57 жасында Стамбулда дүниеден өтті.
Түрік жұртшылығы дәстүр бойынша жыл сайын 10 қарашада Ататүріктің мазарын зиярат етіп, ел негізін қалаушыға құрмет көрсетеді.
