Түркия Сыртқы істер министрлігі бейсенбі күні жариялаған мәлімдемесінде Газада атысты тоқтату келісімін оң қабылдағанын және екі жылға жалғасқан геноцидті тоқтататына үміт білдіретінін атап өтті.
Мәлімдемеде келісімнің толық орындалуы күтілетіні айтылды. Сондай-ақ: «Атысты тоқтату арқылы Газаға гуманитарлық көмектің жеткізілуі және қаланы қайта қалпына келтіру жұмыстарының тез арада басталуы аса маңызды. Түркия Газа халқына ауқымды гуманитарлық көмек көрсетуді жалғастырады», - делінген.
Израиль мен Палестина мәселесі әділ шешілсе ғана Таяу Шығыста тұрақты бейбітшілік орнайтыны айтылып, «Атысты тоқтату жөніндегі келіссөздерде қол жеткізілген серпін алдағы уақытта екі мемлекетке негізделген шешімді жүзеге асыруға да үлес қосады деп үміттенеміз. Біз Катар, Мысыр және АҚШ-тың атысты тоқтату келіссөздеріндегі күш-жігерін жоғары бағалаймыз.Түркия атысты тоқтату келісімінің орындалу кезеңдеріне белсенді түрде қатысуға және қолдау көрсетуге дайын екенін қайталады» – делінген.
Трамптың атысты тоқтату жоспары
АҚШ президенті Дональд Трамп Израиль мен ХАМАС АҚШ ұсынған Газа келісімінің алғашқы кезеңін қабылдағанын хабарлады. 29 қыркүйек күні алғаш рет жарияланған 20 тармақтан тұратын жоспар тұтқын алмасуды, атысты тоқтатуды, ХАМАС-ты қарудан айыруды және Газаның қайта қалпына келтірілуін көздейді.
2023 жылдың қазан айынан бері Газада 67 200 палестиналық қаза тапты. Олардың көпшілігі әйелдер мен балалар. Үздіксіз әуе шабуылдары аймақты өмір сүруге жарамсыз етіп, жаппай көші-қонға, ашаршылық пен түрлі аурулардың таралуына себеп болды.
