БҰҰ Қауіпсіздік Кеңесі Францияның бастамасымен Израильдің Ливанның оңтүстігіндегі әскери операциялары мен бақылауын талқылау үшін шұғыл отырыс өткізді. Отырыс барысында бірқатар мүше мемлекет Израильдің Ливанның оңтүстігінен кетуін талап етті.
БҰҰ Бас хатшысының орынбасары Марта Ама Акьяа Поби Израиль күштерінің Көк сызықтың солтүстігінде орналасуы Ливанның егемендігі мен БҰҰ Қауіпсіздік Кеңесінің 1701-қарарын бұзатынын айтып, Израиль әскерінің шегінуі және Ливандағы мемлекеттік емес қарулы топтардың қарусыздандырылуы қажет екенін мәлімдеді.
Ливанның БҰҰ жанындағы тұрақты өкілі Ахмад Арафа Израильді азаматтық инфрақұрылымға, медицина қызметкерлері мен тарихи нысандарға жүйелі түрде шабуыл жасады деп айыптады.
Ресей мен Қытай Израильдің құрлықтағы операцияларын сынға алып, Газадағы жағдайдың Ливанда қайталанбауы керектігін ескертті.
Ал Франция мен Ұлыбритания қақтығыстарға Хезболла жауапты деп санап, Израильдің әскери әрекеттері шамадан тыс екенін және бейбіт тұрғындарға зиян келтіріп жатқанын атап өтті.
АҚШ болса шиеленіс үшін жауапкершілікті толығымен Хезболла мен Иранға артып, Израильді сынға алудан бас тартты. Ливан үкіметіне қолдау білдірді.
