Жапонияның оңтүстігіндегі жағалау қаласында шыққан өрт 170-тен астам ғимаратты жойып, бір адамның өмірін қиды. Әскери және өрт сөндіру тікұшақтары өртті сөндіруге жұмылдырылды.
Жергілікті БАҚ-тың хабарлауынша, қатты жел әсерінен жалын жақын маңдағы орман жоталарына және жағадан бір шақырымнан астам қашықтықтағы аралға да тараған.
Жапонияның Өрт және апаттарды басқару агенттігі өрттің сейсенбі кешінде басталғанын, шамамен 48 900 шаршы метр аумақты (яғни жеті футбол алаңы көлеміне жуық жерді) күлге айналдырғанын, сондай-ақ Токиодан шамамен 770 км оңтүстік-батыста орналасқан өңірде 175 тұрғынның шұғыл эвакуациялық баспанаға орналастырылғанын хабарлады.
Жергілікті БАҚ полиция деректеріне сүйеніп, бір адамның қаза тапқанын, 50 жастан асқан бір әйелдің жеңіл күйік жарақаттарымен ауруханаға жеткізілгенін жазды.
Жапонияның премьер-министрі Санаэ Такаити “X” желісіндегі жазбасында суық ауа райында эвакуациялануға мәжбүр болған барлық тұрғындарға көңіл айтып, «Үкімет жергілікті билікпен бірлесе отырып барынша қолдау көрсетеді», – деп мәлімдеді.
Кюсю электр компаниясының мәліметінше, өрт салдарынан аймақтағы шамамен 300 үй жарықсыз қалған.
Жер сілкіністерін есепке алмағанда бұл апат 1976 жылғы Сакатадағы өрттен бергі Жапониядағы ең ірі өрт болып саналады.
