Қазақстан Қарулы Күштерінің 11 әскери қызметкері Біріккен Ұлттар Ұйымының (БҰҰ) Ливандағы Уақытша күштері (UNIFIL) аясында бітімгершілік миссияны орындау үшін Ливанға аттанды.
Қазақстан Республикасы Қорғаныс министрлігі таратқан мәлімдемеде бұл миссия үшін халықаралық стандарттарға сай көпсатылы дайындықтан өткен әскерилердің Ливанның оңтүстігінде Үндістан әскери құрамының сапында қызмет ететіні белгілі болды.
Мәлімдемеде атап өтілгендей, қазақстандық бітімгерлер БҰҰ Қауіпсіздік Кеңесінің мандаты шеңберінде атысты тоқтату режимінің сақталуын бақылау, жауапкершілік аймағындағы қауіпсіздік жағдайына мониторинг жүргізу, жергілікті билік органдарымен және тұрғындармен байланысты үйлестіру, гуманитарлық көмек көрсету шараларына қолдау көрсету, патрульдеу жұмыстарын жүргізу, БҰҰ нысандарын күзету және аймақтағы тұрақтылықты қолдау сияқты міндеттерді атқарады.
Қазақстанның Ливандағы БҰҰ бітімгершілік миссиясына қосқан үлесі жаңалық емес екеніне назар аударылған мәлімдемеде аймаққа аттанған бұл топтың еліміздің 11-ші бітімгерлік ротациясы екені көрсетілді. Бұған дейін де UNIFIL аясында Үндістан әскери құрамымен бірге қызмет атқарған қазақстандық сарбаздардың өз міндетін орындау барысында миссия қолбасшылығы мен халықаралық серіктестер тарапынан жоғары бағаланғаны, өздерінің кәсібилігімен, тәртібімен және көпұлтты ортадағы табысты қызметімен ерекшеленгені баса айтылды.
Сондай-ақ мәлімдемеде Қазақстанның БҰҰ-ның бітімгершілік операцияларына қатысуы елдің халықаралық қауіпсіздікті қамтамасыз етуге қосқан маңызды үлесі болып табылатыны, бұл бір жағынан мемлекеттің халықаралық аренадағы беделін арттырса, екінші жағынан әскери қызметшілердің көпұлтты құрамда қызмет ете отырып, маңызды далалық тәжірибе жинақтауына мүмкіндік беретіні атап өтілді.
