Францияда білім беру жағдайын жақсарту талабымен ұйымдастырылған лицей оқушыларының наразылық акциялары аясында 1793 адамның қамауға алынғаны хабарланды.
Франция Білім министрі Эдуар Жеффре “France 2” телеарнасының эфирінде лицей оқушыларының наразылық акцияларына қатысты мәлімдеме жасады.
Жеффре наразылықтарға байланысты бүгін 400-ден астам білім беру мекемесі жабық болатынын айтып, аталған оқу орындарындағы оқушылардың сабағы онлайн форматта өтетінін мәлімдеді.
Наразылық акциялары кезінде білім беру саласының 65 қызметкері мен 170 оқушының жарақат алғанын айтқан Жеффре: «Лицей оқушыларының қозғалысын шектен тыс зорлық-зомбылықты жақтайтын қозғалыс өз бақылауына алды», – деді.
Министр Жеффре бұл жағдайды мемлекеттік қызметтердің жұмысын бұзуға бағытталған әрекет деп бағалап, сабыр сақтауға шақырды.
Ұлттық БАҚ-тың хабарлауынша, префектілер бүгін жабық болатын лицейлердің алдында наразылық акцияларын өткізуге тыйым салды.
Әділет министрлігінің мәліметінше, 28 қыркүйектен бері аталған наразылық акцияларына байланысты 1793 адам қамауға алынды.
Франция Ішкі істер министрлігінің дерегіне сәйкес, кеше наразылық акциялары барысында 1949 адамға қатысты құқықтық шара қолданылды. Сондай-ақ бір күн ішінде 305 полиция және жандармерия қызметкері жарақат алды.
Кеше өткен наразылық акциялары елдегі 3 мың 700-ге жуық лицейдің 1027-сін қамтыды.
Францияда лицей оқушылары өткен аптадан бері білім беру жағдайын жақсартуды, мектептеріне көбірек қаржы бөлуді және қызметкерлер санын арттыруды талап етіп, наразылық акцияларын өткізіп келеді.
