«Wall Street Journal» басылымының хабарлауынша, АҚШ президенті Дональд Трамп Сауд Арабиясына азаматтық ядролық бағдарлама әзірлеуге мүмкіндік беретін тарихи келісімді ресми түрде мақұлдады.
Басылым АҚШ шенеуніктеріне сілтеме жасап, 30 жылға жасалған келісімнің құны ондаған миллиард доллар болуы мүмкін екенін жазды.
Келісім америкалық компанияларға Сауд Арабиясының ядролық инфрақұрылымын дамытуға мүмкіндік беріп, бұл саладағы өзге шетелдік бәсекелестерді ығыстыруды көздейді.
Келісімнің маңызды тармақтарының біріне сәйкес, Вашингтон мен Эр-Риядтың бірлескен сараптамасы уран байыту зауытын салу қажет деп шешсе, оны Сауд Арабиясында америкалық компаниялар тұрғыза алады.
Басылымның мәліметінше, келісім АҚШ-қа Сауд Арабиясының ядролық жоспарын бақылауға мүмкіндік береді. Трамп әкімшілігінің өкілдері бұл келісім бағдарламаның ядролық қару әзірлеуге бағытталмауын қамтамасыз етеді деп есептейді.
Алдағы күндері АҚШ Конгресінің қарауына жіберілетін бұл келісім Таяу Шығыста ядролық әлеуеттің артуына алаңдайтын заң шығарушылардың қарсылығына тап болуы мүмкін.
