“Юта университетінде консервативті белсенді Чарли Киркті атып өлтіруге күдікті адам ұсталды”, деп АҚШ президенті Дональд Трамп мәлімдеді. Осылайша Трамп «жантүршігерлік қастандық» деп атаған жағдайдан кейінгі қарқынды іздестіру жұмыстары аяқталды.

Киркті өлтіруші сәрсенбі күні Юта университетінде өткен шара кезінде бір оқ атып, Киркті өлтіргеннен кейін 24 сағаттан астам уақыт бойы полиция мен федералды агенттерден қашып жүрген.

«Біз оны ұстадық деп ойлаймын», – деді Трамп “Fox News” арнасына берген сұхбатында. Ол күдіктіні білетін бір адамның оны ұстап бергенін айтты.

Күдікті 22 жастағы Тайлер Робинсон екені анықталды. Бұған дейін АҚШ тергеушілері Киркті өлтіруге қолданылған деп болжанған мылтықты тапқанын және күдікті ретінде қарастырылған адамның суреттерін жариялаған болатын.

Федералдық тергеу бюросы қауіпсіздік камераларынан алынған, қара киім, қара көзілдірік және қара бейсбол қалпағын киген «қатысты адамды» көрсететін сапасыз суреттерді таратты. Ұзын жеңді киімде АҚШ туының үстінен ұшып бара жатқан бүркіттің суреті бейнеленген.

Кирк – жазушы, подкаст жүргізушісі және Трамптың жақын серіктесі ретінде Республикалық партияның жас сайлаушылар арасындағы қолдауын арттыруға көмектескен тұлға.

Федералдық тергеу бюросы және штат өкілдерінің айтуынша, өлтіруші шара басталмастан бірнеше минут бұрын кампусқа келген. Кирк 3,000 адам қатысқан «Мені қате екенімді дәлелде» атты пікірталас шарасын жүргізіп жатқан болатын. Бұл шара Солт-Лейк-Ситиден оңтүстікке қарай 65 шақырым жерде орналасқан Юта алқабындағы университетте өтті.

Бейсенбі күні сабақтар тоқтатылып, ғимараттың шатыры мен жақын маңдағы орман аймағы қоршауға алынды. Тергеушілер дәлел іздеді.

Трамп Киркті елдің ең жоғары азаматтық марапаты – Президенттік Бостандық медалімен марапаттайтынын айтты.