Женевада өткен Еуропа хабар тарату одағының (EBU) 95‑ші Жалпы ассамблеясында Израильдің Евровидение ән байқауына қатысуы мәселесі бойынша талас туды. Мүшелер жаңа ережелер мен Израиль қоғамдық хабар таратушысы “KAN”-ның 2026 жылғы жарыстағы мәртебесін талқылады.

Дауыс беру басталардан бұрын мүшелер Израиль Газада жаппай геноцид жүргізіп жатқанда “KAN” арнасының мәртебесі жөнінде мәлімдеме жасады.

EBU-ның негізін қалаған мүшелерінің бірі ретінде сөйлеген “TRT World” арнасының басты ұйымы TRT Газадағы жағдайға байланысты Израильдің Евровидение құндылықтарына сай келмейтінін білдірді.

TRT делегациясы «Бұл залдағы барша сияқты біз, TRT, әлем көз алдында онжылдықтар бойы жалғасып келе жатқан қудалау мен геноцидті көріп отырмыз. Сөз жүзіндегі бітім басталғалы бері ондаған бала қаза тауып, көмек әлі де қауіпсіз түрде Газаға жете алмай отыр. Израильдің қолынан 270‑тен астам журналист көз жұмды. Біздің ұстанымымыз айқын: KAN-ның қатысуына рұқсат беру бұл байқаудың құндылықтарына сай емес және орынды емес. Рұқсат берілмеуі керек» деп мәлімдеді.

Ирландияның “RTÉ” сол ұстанымды қайталап, «Газадағы қорқынышты адам шығыны мен жалғасып жатқан гуманитарлық дағдарысты ескерсек, Израильдің “KAN” арнасы байқауда қалатын болса, біздің бұл байқауда болуымыз моральдық тұрғыдан қабылданбайды» деді.

Израиль хабар таратушы органының өкілі сөз алған кезде TRT корпорациясының өкілдері наразылық ретінде залдан шығып кетті.

TRT және тағы бірнеше мүше ашық дауыс беруді сынға алып, құпия дауыс беруді талап етті.

Соңында Жалпы ассамблея жаңа ережелерін бекітті, бірақ Израильдің қатысуы туралы жеке дауыс беруді өткізбеу туралы шешім қабылдады.

Германия мен Австрия мүшелері “KAN” арнасын ашық қолдады, ал дауыс беруден кейін Испания, Словения, Ирландия және Нидерландының хабар таратушылары 2026 жылғы Евровидение байқауына бойкот жариялайтындарын мәлімдеді.

Израильдің Газаға қарсы соғысы АҚШ ұйытқы болған бітімгершілікке қарамастан жалғасып жатыр; палестиналықтар арасындағы шығын артып отыр.