Түрік қорғаныс саласы өкілдерінің айтуынша, «HÜRJET» ұшағының екі прототипі шамамен 340 және 260 сағаттық ұшу сынағынан өтті. Түркия алғашқы жетілдірілген реактивті оқу-жаттығу ұшағының сынағы, жаппай өндірісі және экспорты бағытында айтарлықтай ілгерілеуде.
Түрік авиация және ғарыш өнеркәсібі («TUSAŞ») әзірлеген «HÜRJET»-ті 2026 жылы Түрік Әуе күштерінің «Түрік жұлдыздары» көрсетілім тобына тапсыру жоспарланып отыр. Тапсырылады деп жоспарланған ұшақтың құрастыру жұмыстары жалғасуда, ал жаңа жасалған ұшақтың алғашқы ұшуы келесі жылдың алғашқы тоқсанында жүзеге асуы мүмкін.
Жоба 2017 жылдың тамызында басталған, ал ұшақ алғашқы ұшуын 2023 жылдың сәуір айында орындаған. Бұған дейін алғашқы толықтырылған компонент 2022 жылдың маусымында соңғы жинақтау желісіне кірген болатын. Кейін шасси сынақтары, кабель тексерістері, кабинаның жоғарғы механизмдері және толық авионика, электр және жанармай жүйелерінің сынақтары жүргізілді.
Түркияның алғашқы реактивті қозғалтқышты жоғары жылдамдықтағы оқу-жаттығу ұшағының қозғалтқышы алғаш рет 2023 жылдың 30 қаңтарында іске қосылды. 2023 жылғы 25 сәуірде ұшақ алғашқы ұшуын орындады. Сол уақыттан бері сынақтар жобалық мүмкіндіктер аясында жалғасып келеді.
Сынақ кезінде екі «HÜRJET» әртүрлі камуфляжбен жұптық ұшулар орындады, сондай-ақ бір ұшақ «Түрік жұлдыздары» көрсетілім тобымен бірлескен ұшуларға қатысты. Бұл көрсетілімдер көпшіліктің қызығушылығын тудырды.
«TUSAŞ» айына екі ұшақ шығара алатын өндіріс желісін құруда. Түрік Әуе күштері бастапқы кезеңде 16 ұшақ сатып алуды жоспарлауда. Жаңа конфигурациялар қосылған сайын жалпы сан арттырылмақ.
Бір қозғалтқышты реактивті ұшақ заманауи әскери ұшқыштарды оқыту, қарулы және қарусыз әуе патрульдері мен көрсетілімдер жүргізу үшін жасалған. Ұзындығы 13,6 метр, биіктігі 4,1 метр, қанат жайылымы 9,5 метр болатын «HÜRJET» 1,4 мах жылдамдығына жете алады және 45 мың фут биіктікте ұшу қабілетіне ие. «HÜRJET» әртүрлі тапсырмаларға арналған жеті ілгіш нүктесін және жалпы үш тоннаға дейінгі жүк көтеру мүмкіндігін ұсынады.
«TUSAŞ» «HÜRJET» бойынша Испаниямен экспорт келісімін жасауға дайындалуда. «TUSAŞ» бас директоры Мехмет Демироғлу испандық «El Español» басылымына берген сұхбатында соңғы жеткізу келісіміне жақын арада қол қойылуы мүмкін екенін айтты.
«HÜRJET» негізінен оқу-жаттығу мақсатында жасалған реактивті ұшақ екенін атап өткен Демироғлу жаңа миссия мен әртүрлі нұсқаларға сұраныс пайда болған жағдайда, «TUSAŞ» бұл талаптарды тез орындай алатын әлеуетке ие екенін жеткізді. Нұсқаларға қатысты нақты мәлімет пен жеткізу кестесі келісімге қол қойылғаннан кейін жарияланбақ.
Келісім Испанияның ескірген «F-5» флотының орнын басу үшін шамамен құны 3,12 млрд еуро (3,6 млрд доллар) болатын 45 дана «HÜRJET» сатып алуды көздейді. Жеткізілімдердің 2028 жылы басталуы жоспарланып отыр.
