Камбоджа Қорғаныс министрлігі соңғы шабуылда жеті бейбіт тұрғын қаза тапқанын және бірнеше адамның жараланғанын хабарласа, Тайланд үйлер шекарадан атылған снарядтардан бүлінгенін мәлімдеді.

Камбоджа Қорғаныс министрлігінің ресми өкілі генерал Мали Сочета сейсенбі күні мемлекеттік “Agence Kampuchea Presse” агенттігіне берген сұхбатында Тайланд күштерін Камбоджа аумағында «агрессиялық» әскери әрекет жасады деп айыптады. Оның айтуынша, дүйсенбі күнінен бері кемінде жеті бейбіт тұрғын қаза тауып, 20 адам жараланған.

Ол бұл әрекеттерді «адамгершілікке жат және қатыгез» деп атап, Тайланд күштерін 26 қазанда АҚШ президенті Дональд Трамп пен Малайзия премьер-министрі Анвар Ибрагимнің қатысуымен екі ел басшысы қол қойған бітім мен Бірлескен декларацияны бұзды деп айыптады.

Сонымен қатар “Khmer Times” газеті Пурсат провинциясының Тхма Да аймағындағы Камбоджа казиносына Тайланд әскері шекара асып артиллериялық соққы жасағаннан кейін шабуыл болғанын жазды.

Камбоджалық БАҚ Тайланд әскері F-16 жойғыштарын қолданғанын және Оддар Менчей провинциясының Самронг қаласына бомба тастағанын хабарлады.

Алайда Анадолы агенттігі казиноға шабуыл жасалғаны мен Самронгқа бомба тасталғаны туралы ақпаратты растай алмады. Тайланд билігі әзірге оқиға жөнінде ресми мәлімдеме берген жоқ.