Ресейде үш күнге созылатын парламент сайлауына дауыс беру басталды.
Сайлауда президент Владимир Путиннің «Біртұтас Ресей» партиясы жеңіске жетуі мүмкін.
Ресей парламентінің төменгі палатасы Мемлекеттік думадағы 450 депутаттық орынның иелерін анықтайтын сайлау жексенбі күні Түркия уақытымен 21:00-ге дейін жалғасады. Алғашқы нәтижелер дауыс беру аяқталғаннан кейін бірден жариялануы мүмкін.
Ресейде 2022 жылдан бері алғаш рет парламент сайлауы өтіп жатыр. Дауыс беру Ресей басып алған Украинаның шығысындағы аумақтарда да ұйымдастырылуда.
Ресейлік сайлаушылар мен сарапшылар қазіргі Думада басымдыққа ие «Біртұтас Ресей» партиясы сайлауда жеңіп, заң шығарушы органдағы үстемдігін сақтап қалады деп күтеді.
«Біртұтас Ресейден» бөлек, сайлауға Владимир Путинді және Украинадағы соғыстың жалғасуын әртүрлі деңгейде қолдайтын партияларға ғана қатысуға рұқсат берілді. Олардың қатарында КПРФ коммунистері, ЛДПР ұлтшылдары, «Әділетті Ресей» консерваторлары және «Жаңа адамдар» либералдары бар.
Ресей президенті сәрсенбі күні кешке жасаған үндеуінде азаматтарды дауыс беруге шақырды.
Ол: «Сіздердің таңдауларыңыз бен шешімдеріңіз Украинадағы қақтығыс кезінде миллиондаған адамның жауынгерлерімізді қолдайтынын және халқымыздың біртұтас екенін тағы бір рет көрсетеді», — деді.
Ал сайлауға қатысуына тыйым салынған шетелдегі оппозиция өз жақтастарының санын көрсету мақсатында соғысқа қарсы барлық ресейлікті 20 қыркүйек күні түсте бір мезгілде Владимир Путиннің партиясына қарсы дауыс беруге шақырды.
