Түркия ұлттық футбол құрамасы Австралияға қарсы өткен алғашқы матчтағы жеңілістен кейін 2026 жылғы FIFA Әлем кубогының «D» тобындағы екінші кездесуінде Парагвайдан маңызды жеңісті еншілеуге бар күшін салуда.
АҚШ-тың Аризона штатындағы жаттығу лагерінде журналистерге сұхбат берген қақпашы Угурджан Чакыр: «Алдымызда еншілейтін 6 ұпай бар. Бірінші ойын Парагваймен өтеді, бұл матчта жеңіске жетіп, 3 ұпайды алғымыз келеді», — деп мәлімдеді.
Канаданың Ванкувер қаласындағы «BC Place» стадионында өткен ойында Австралия құрамасы Түркияны 2-0 есебімен жеңген болатын.
«Трабзонспорт» клубында өнер көрсететін Чакыр: «Алғашқы ойын негізінде финалдық бәсеке емес еді. Алдымызда 2 финалдық матч бар. Біз бітті демейінше, бітпейді», — деп қосты. Сондай-ақ ол Австралиямен ойында кеткен қателіктерді саралап, Парагвайға қарсы мықты өнер көрсетуге бекініп отырғандарын жеткізді.
Қорғаушы Самет Акайдын командаласының сөзін қуаттап, бұл жеңіліс құраманың жігерін құм қылмай, керісінше оларды ширата түскенін айтты. Командаға сенетінін және өзара жиналып, жағдайды талқылағандарын білдірген Акайдын: «Парагвайға қарсы ойында бұл олқылықтың орнын толтыратынымызға сенімдімін», — деді.
Сәтсіз басталған стартқа қарамастан Акайдын жанкүйерлерді қолдауды тоқтатпауға шақырды. «Ел болып мынаны түсінуіміз керек: біз 24 жылдық үзілістен кейін Әлем кубогына жолдама алдық. Қазір алдымызда өте маңызды Парагвай матчы тұр. Бізге дәл қазір қолдау қажет. Бұл команда осы уақытқа дейін үлкен жетістіктерге жетті. Бұны осы құрам атқарды, тағы да жасай алады. Бұл ойында қолдауларыңызды аямаңыздар», — деп толықтырды.
«Ай-жұлдыздылар» 19 маусымда Парагваймен, ал 25 маусымда турнир қожайындарының бірі — АҚШ құрамасымен кездеседі.
АҚШ, Мексика және Канаданың ұйымдастыруымен өтіп жатқан 2026 жылғы FIFA Әлем кубогы 11 маусымда басталды. Доп додасы 19 шілдеге дейін жалғасады және онда 48 ел бақ сынауда.
