Түркияның Ұлттық барлау ұйымы сейсенбі күні «Арабиялық Лоуренс» деген атпен танымал ағылшын офицері және барлаушысы Томас Эдвард Лоуренске қатысты мұрағаттық барлау құжатын жариялады.
Барлау қызметінің ресми интернет сайтында жарияланған құжатта Лоуренстің әскери киімдегі фотосуретімен бірге оның Таяу Шығыстағы жүріс-тұрысы мен қызметіне қатысты барлау деректері қамтылған.
Барлау қызметінің мәліметінше, Лоуренс Мысыр, Сирия және Иракта әртүрлі бүркеншік ат қолданып, түрлі кейіпке еніп саяхаттаған. Аталған құжатта Лоуренстің Мысырда жалған есіммен болғаннан кейін Сирия мен Иракқа өткені, кейінірек Иерусалимге барып, содан соң Суданның Хартум қаласына орныққаны алға тартылады.
Сонымен қатар құжатта Лоуренстің Иерусалимде болған кезінде кейде мұсылман дін мұғалімі, кейде еврей раввині ретінде әрекет етіп, мұсылман және еврей қауымдастықтарымен бөлек-бөлек жиналыстар өткізгені айтылады. Құжатта оның арандатушылық сипаттағы хабарламалар арқылы жергілікті халыққа әсер етуді көздегені алға тартылған.
Мұрағат мәтінінде Осман империясы дәуіріндегі барлау қызметкерлерінің Мысыр, Палестина және Судандағы ағылшын саясатына қатысты анализдері де бар. Онда аймақта іріткі салуға және саяси оқиғалардың барысына әсер етуге бағытталған әрекеттердің болғаны атап өтіледі.
1929 жылғы 23 қыркүйектегі бұл құжат Барлау қызметінің интернет парақшасындағы «Арнайы коллекцияның» «Құжаттар» бөліміне қосылды.
Барлау қызметі бұл құжаттың жариялануы тарихи барлау материалдарын мекеменің цифрлық мұрағаттары арқылы жұртшылыққа қолжетімді ету бағытындағы жұмыстардың бір бөлігі екенін мәлімдеді.
