Румыния премьер-министрі Марчел Чолаку дүйсенбі күні отставкаға кетті. Бұл шешімді ол демалыс күндері өткен президенттік сайлаудың алғашқы турында өзі қолдаған үміткердің жарыстан шығып қалуы мен әсіре оңшыл кандидат Джордж Симионның жеңісінен кейін қабылдады.

Уақытша президент Илие Боложанның кеңсесі Чолакудың отставкасын қабылдағанын және сейсенбі күні уақытша премьер-министр тағайындалатынын хабарлады.

“Antena3” телеарнасының хабарлауынша, Румынияның Социал-демократиялық партиясы саяси кеңесінің отырысынан кейін партия жетекшісі болып та табылатын Чолаку коалициялық үкімет қолдаған үміткер Крин Антонескудың жеңілісінен соң қызметтен кетуге шешім қабылдағанын мәлімдеді.

Ол сайлау нәтижелері үкіметтің сеніміне нұқсан келтіргенін айтып,
«Болашақ президент мені қызметтен босатқанын күтудің орнына, отставкаға өз еркіммен кетуге бел будым», -деді.

Сонымен қатар партия 18 мамырда өтетін президент сайлауының екінші турына ешбір үміткер ұсынбайтынын жариялады.

Джордж Симион бірінші турда 40,9%-дан астам дауыс жинап, үлкен басымдықпен жеңіске жетті. 38 жастағы Симион әсіре ұлтшыл және Еуропа Одағына қарсы ұстанымдары мен даулы мәлімдемелерімен танымал.

18 мамырда ол сайлауда шамамен 21% дауыс жинаған Бухаресттің орталықшыл көзқарастағы мэрі Никушор Данмен екінші турда бәсекеге түседі.

24 қарашада өткен президенттік сайлаудың алғашқы турында ресейшіл, әсіре оңшыл үміткер Кэлин Горгеску жеңіске жеткен еді. Алайда Румыния Конституциялық соты сайлау процесі Ресей қолдаған кампания арқылы Горгеску пайдасына бұрмаланды деп айтып, сайлау нәтижелерін және 8 желтоқсанға жоспарланған екінші турды жарамсыз деп таныды.