Сирия Ішкі істер министрлігі ұсталған Таха әл-Зоубидің Дамаск қаласындағы ДАИШ операцияларына жетекшілік еткенін мәлімдеді. Сирияның мемлекеттік БАҚ-тары күдіктінің жарылғыш белбеумен ұсталғанын хабарлады.
Сирия билігі Дамаск қаласының маңында Сирия қауіпсіздік күштері мен АҚШ бастаған халықаралық коалицияның бірлескен операциясы барысында ДАИШ-тің жоғары дәрежелі жетекшісі ұсталғанын хабарлады.
Күдікті сәрсенбі күні кешке қарай бірнеше көмекшісімен бірге қамауға алынды.
Дамаск маңындағы Ішкі қауіпсіздікке жауапты бригадалық генерал Ахмед әл-Далати Сирияның ресми “SANA” ақпарат агенттігіне берген сұхбатында тұтқындау ұзақ уақытқа созылған бақылау мен қадағалау нәтижесінде жүзеге асқанын айтты.
Әл-Далатидің сөзінше, операция Ішкі істер министрлігіне қарасты Бас барлау басқармасы тарапынан коалиция күштерімен үйлестіру арқылы Муаддамия аймағында әрекет еткен ДАИШ ұясына қарсы жүргізілген.
Сондай-ақ ол әл-Зоуби мен оның кейбір көмекшілерінің жарылғыш белбеулермен ұсталғанын мәлімдеді.
