АҚШ президенті Дональд Трамп пен Түркия президенті Режеп Тайып Ердоған Ақ Үйде өткен кездесуде қорғаныс және сауда салаларындағы ынтымақтастықты тереңдетуге уәде берді.

Трамп Ердоғанмен бірге Түркияның F-16 және F-35 бағдарламаларын қоса алғанда, АҚШ-та жасалған жойғыш ұшақтарды жеткізу, сондай-ақ экономикалық ынтымақтастық мәселелерін талқылағанын айтты.

«Екі ел үшін де тамаша сауда келісімдерін жасаймыз», – деді Трамп журналистерге. Ол сонымен қатар Анкараның Ресейден зымыран жүйелерін сатып алуына байланысты енгізілген санкциялардың «дереу» алынуы мүмкін екенін білдірді.

Президент Ердоған да кездесулердің қорғаныс өнімдерінің саудасын да қамтитын кең тақырып аясында өткенін атап өтті.

«Түркия–Америка қарым-қатынасында жаңа бір кезеңді бастан кешіп отырмыз», – деді Ердоған. «Сенемін, бірге қол ұстасып аймақтағы бұл қиындықтарды еңсереміз» деді.

Трамп Ердоғанды «аса құрметті адам» деп атап, Ердоғанның «елінде де, бүкіл Еуропада және дүниежүзінде де өте жоғары бағаланатынын» айтты.

НАТО одақтастары арасында қорғаныс жабдықтарын жеткізу, өңірлік қақтығыстар және қаржылық санкциялар секілді мәселелер бойынша ұзаққа созылған келіспеушіліктер болғанына қарамастан, бұл кездесуде екі көшбасшының келісімшіл реңк танытып, ынтымақтастықты атап өтуі назар аударды.