“Тайваньның «Цифрлық істер министрлігі «Facebook»-тің бас компаниясы «Meta Platforms Inc.»-ке жарнама беруші ақпаратының «ашықтығы жеткіліксіз болғаны» үшін $512 324 айыппұл салды”, - деп хабарлайды «Focus Taiwan».

Цифрлық істер министрлігі соңғы 23 жарнама берушіге қатысты ашықтықты қамтамасыз етпегені үшін «Мeta»-ға айыппұл салды. Билік өкілдері компанияның жарнама беруші, қаржыландырған адам немесе ұйым туралы ақпарат беруді талап ететін Алаяқтықтың алдын алу туралы заңын орындамағанын айтты.

Бұл - Тайваньдағы «Мeta»-ның дәл осындай мәселе бойынша екінші айыппұлы. 22 мамырда компанияға 35 мың доллар көлемінде айыппұл салынған болатын.

Тайваньдағы алаяқтық сипаттағы жарнамалардың негізгі көздерінің бірі ретінде «Facebook» танылып отыр.

2024 жылдың аяғында «CommonWealth» журналында жарияланған Ғаламдық анти-алаяқтық альянсының сауалнамасына сәйкес, тайваньдық респонденттердің 60%-ынан астамы «Meta» платформасында алаяқтық хабарламаларға тап болғанын айтты.

«Focus Taiwan» мәліметтері бойынша, «Мeta» 2024 жылдан бері тексеру процесін күшейтіп, пайдаланушылар растамайынша жарнамалар жариялауына жол бермейтінін білдірді.

Компания 2024 жылы платформаларынан 146 000-нан астам жарнама аккаунтын және 1,6 миллион жалған жарнаманы жойғанын мәлімдеді.

«Мeta» ашықтықты арттыруды жалғастыратынын және платформа қауіпсіздігін жақсарту үшін Цифрлық істер министрлігі және Қылмыстық тергеу бюросымен бірлесіп жұмыс істейтінін білдірді.

«Мeta»-ға мәселені шешу үшін 30 күн берілді, әйтпесе жаңа айыппұл салынуы мүмкін.