Ұшу мәліметтеріне сәйкес, Нетаньяхудың ұшағы Халықаралық қылмыстық соттың (ХҚС) тұтқындау ордеріне қарамастан осы сотқа мүше үш елдің әуе кеңістігін кесіп өткен.
“FlightRadar” бақылау сайтының хабарлауынша, Нетаньяху АҚШ-қа барар жолында Грекия, Италия және Францияның үстімен ұшып өткен.
Еске сала кетейік, ХҚС 2024 жылғы 21 қарашада Нетаньяхуды 2023 жылдың қазан айынан бері 72 000-нан астам палестиналық қаза тапқан Газа секторында соғыс қылмыстары мен адамзатқа қарсы қылмыстар жасады деп айыптап, оны тұтқындауға бұйрық шығарған болатын.
Әуе кеңістігі пайдаланылған үш ел де ХҚС-ты құрған Рим статутына тарап болып табылады және сотпен ынтымақтастық орнатуға, соның ішінде тұтқындау туралы бұйрықтарды орындауға құқықтық тұрғыдан міндетті. Дегенмен бірде-бір мемлекет Израиль ұшағына өз әуе кеңістігін жапқан жоқ.
Бұл бағыт Нетаньяхудың желтоқсан айының соңында АҚШ президенті Дональд Трамппен кездесу үшін жасаған сапарындағы маршрутына ұқсас. Бұған дейін Израиль басшысы тұтқындалып қалудан қауіптеніп, кейбір елдердің әуе кеңістігінен айналып өтетін. Бірақ өткен жылдың қыркүйегінде БҰҰ Бас Ассамблеясына қатысу үшін Нью-Йоркке барғанда, Нетаньяхудың ұшағы Грекия мен Италия арқылы өтіп, тек Францияның әуе кеңістігінен қашқақтаған болатын.
Сейсенбі күні таңертең Нетаньяху Тель-Авив маңындағы Бен-Гурион әуежайынан Вашингтонға аттанды. Ол жерде Трамппен Иран мәселесіне назар аударатын келіссөздер өткізеді деп күтілуде. Бұл сапар АҚШ пен Иран арасындағы Оман астанасы Маскатта өткен жанама келіссөздерден кейін аймақтағы шиеленістің күшеюі мен АҚШ-тың әскери қатысуы артқан тұста жүзеге асып отыр.
