Президент Ердоған Вьетнам президенті То Ламмен кездесті. Кездесу барысында Түркия мен Вьетнам арасындағы қарым-қатынастар, сондай-ақ өңірлік және жаһандық мәселелер талқыланды.
Президент Ердоған екі ел арасындағы қарым-қатынасты Стратегиялық әріптестік деңгейіне көтеру жөніндегі Түркияның ұсынысына Вьетнамның оң жауап бергеніне ризашылығын білдірді. Ол Вьетнаммен инвестиция, сауда, қорғаныс өнеркәсібі және басқа да көптеген саладағы ынтымақтастықты дамыту бағытында жұмыс жүргізіліп жатқанын атап өтті.
Ердоған Ливия Президенті кеңесінің төрағасы Мұхаммед Юнус әл-Менфимен де кездесті.
Түркия мен Ливия арасындағы қарым-қатынастар, өңірлік және жаһандық мәселелер талқыланған кездесуде Ердоған Түркияның Ливиядағы тұрақтылықты сақтау үшін күш салып жатқанын айтты. Ол диалог пен өзара келісімге бағытталған үдерістің жалғасуы маңызды екенін және Түркияның Ливияның мүддесіне қайшы келетін ешбір шешімді қолдамайтынын атап өтті.
Ердоған екі елдің энергетика, қорғаныс және тау-кен салаларындағы ынтымақтастығын арттыру бағытындағы жұмыстар жалғасып жатқанын жеткізді.
Сондай-ақ Ердоған Кувейттің тақ мұрагері Сабах Халид әл-Хамад ас-Сабахпен кездесті.
Кездесуде Түркия мен Кувейт арасындағы екіжақты қарым-қатынастар, сондай-ақ өңірлік және жаһандық мәселелер сөз болды.
Ердоған екі елдің сауда және энергетика салаларын қоса алғанда, көптеген бағыттағы ынтымақтастықты дамыту үшін жұмыс істеп жатқанын айтты. Өңірдегі күрделі әрі қақтығыстарға толы кезеңде Түркияның Кувейт секілді бауырлас елдердің жанында екенін атап өтті.
Президент Ердоған Израильдің өңірдегі шабуылдарын тоқтату қажеттігін айтып, осы мақсатқа бағытталған халықаралық күш-жігерді қолдаудың маңыздылығына назар аударды.
Ердоған Косово премьер-министрі Альбин Куртиді де қабылдады.
Кездесу барысында Түркия мен Косово арасындағы екіжақты қарым-қатынастар, өңірлік және жаһандық мәселелер талқыланды.
Президент екі ел арасындағы сауда көлемін арттыру үшін қадам басылатынын, сондай-ақ қауіпсіздік пен қорғаныс өнеркәсібі салаларындағы ынтымақтастықты одан әрі дамытатынын айтты.
Ердоған Түркияның Косовоның халықаралық қоғамдастықта лайықты орнын алуына қолдау көрсетуді жалғастыратынын атап өтті. Сонымен қатар Түркияның Балқан елдері арасындағы диалогты қолдайтынын мәлімдеді.
Бұдан кейін Ердоған Ливан премьер-министрі Науаф Саламмен кездесті.
Кездесуде Ердоған Түркияның Ливанда тұрақты бейбітшілік пен тұрақтылық орнату үшін күш салып жатқанын айтты. Ол БҰҰ-ның Ливандағы уақытша күштерінің орнына халықаралық бастама қажет екенін атап өтті.
Ердоған Түркияның қиын кезеңдерде Ливан халқының жанында болатынын, елге гуманитарлық көмек пен медициналық қолдау көрсетуді жалғастыратынын жеткізді.
Президент Ердоған сондай-ақ Грузия премьер-министрі Ираклий Кобахидзені қабылдады.
Кездесуде Түркия мен Грузия арасындағы қарым-қатынастар, сондай-ақ өңірлік және жаһандық мәселелер талқыланды.
Президент Ердоған Түркияның соңғы 18 жыл бойы Грузияның ең ірі сауда серіктесі болғанына ризашылығын білдірді. Ол сауда, көлік және қауіпсіздік салаларын қоса алғанда, көптеген бағыттағы ынтымақтастықты одан әрі дамытуға бағытталған қадамдардың жалғасатынын айтты.
Ердоған екі елдің халықаралық аренада өзара қолдауын жалғастыруы маңызды екенін атап өтіп, Түркия–Грузия–Әзербайжан ынтымақтастық тетіктерін барынша тиімді пайдаланудың барлық тарапқа пайда әкелетінін жеткізді.
