Медициналық дереккөздердің мәліметінше, Израиль қоршаудағы Газа секторында жасаған шабуылдарынан үш палестиналық қаза тауып, бірнеше адам жараланған. Тағы бір адам бұған дейін Израиль шабуылынан алған жарақатынан көз жұмды.
«Әл-Ауда» ауруханасының хабарлауынша, Газаның орталығындағы Нусейрат босқын лагерінің батысында, Нувайри төбесі маңына қоныс аударған отбасылар тұрып жатқан шатырға Израиль дроны соққы жасаған. Шабуыл салдарынан 28 жастағы Саиб Әбу Муалла қаза тауып, бірнеше адам жараланды.
Жергілікті дереккөздердің мәліметінше, бұған дейін Хан Юнустың батысындағы Әл-Мауасидің «Бир 19» аймағына қоныс аударған палестиналықтар орналасқан шатырларға Израиль күштері оқ атқан. Салдарынан 59 жастағы Муфид Абдул Хамид Әбу әл-Анин қаза тауып, бірнеше адам жараланған.
Жергілікті дереккөздердің хабарлауынша, Дейр әл-Балахтың шығысында Израиль дроны бір топ бейбіт тұрғынға жарылғыш зат тастап, бір палестиналық жараланған. Ал Рафахтың Әл-Мауаси аймағындағы Муавия мешітінің маңында танктен атылған снаряд тағы бір ер адамды жаралаған.
Газаның солтүстігінде Джабалия босқын лагерінің батысындағы Әл-Фалужа ауданында Израиль дронының шабуылына ұшыраған Мұхаммед Әбу Ашкиян ауыр жарақаттан көз жұмды.
Сондай-ақ «Әл-Шифа» ауруханасы бұған дейін Израиль шабуылынан жараланып, ем қабылдап жатқан 34 жастағы Абдулла Ахмед Хасанның қайтыс болғанын хабарлады.
Басып кіру және бульдозерлермен қирату
Куәгерлер «Anadolu» агенттігіне таңсәріде Израильдің әскери көліктерінің бір бульдозермен бірге Газа қаласының оңтүстік-шығысындағы Зейтун ауданына қарай шамамен 150 метр ілгерілегенін айтты.
Басып кіру қарқынды атыс, артиллериялық соққылар және бульдозерлермен қирату әрекеттерімен қатар жүрді. Жергілікті тұрғындар түні бойы жарылыстар болғанын хабарлады.
Жергілікті дереккөздердің мәліметінше, Израиль күштері «Сары сызықты» белгілейтін бетон бөгеттерді алып тастағаннан кейін Салах әд-Дин көшесі бойымен Даула қиылысына қарай жылжып, бақылау аумағын кеңейткен.
Израиль қоршаудағы аумақтың басым бөлігін қирандыға айналдырып, тұрғындардың барлығын дерлік қоныс аударуға мәжбүр етті.
